Tura, Dec 11: Garo Hills Autonomous District Council (GHADC)-o kam ka·enggiparang, ja 30 batpile dormaharangko man·tokkujaengani gimin kam ka·giparangoni bang·batan Sukrobar saloni a·bachenge an·tangtangni kamrangko watna a·bachengtokaha.
GHADC-o kam ka·enggiparangna ja 30 batpile dormaharangko on·na nangkuengoba, da·o jasanikosan dormahako on·na gita GHADC-ni Administrator ku·rachakatahachim.
GHADC)-o kam ka·enggipa manderang, an·tangtangni man·na nangkuenggipa dormaharangoniko jasani dormahako man·gen ine Bristibar attamo GHADC-ni Administrator Dr Vijay Kumar D parakatahachim.
GHADC-o kam ka·enggiparangna on·na ku·rachakenggipa jasani dormahara 2018 bilsini July jani dormaha ong·gen ineba ua u·iatahachim.
Indake ong·engon, ja 30 batpile grorang dongkuengani ja·manoba GHADC-o kam ka·enggiparangna jasani dormahakosan on·na ku·rachakahani gimin kam ka·enggipa manderang suk ong·jaenba, kamtangtangko watna a·bachengskaaha ine u·iataha.
