Shillong, Jan 4: East Jaintia Hills a•jani Iapmala songo, gital bilsiko maniani bak gita jinma ale cha•ani ja•man saaniko man•gipa manderang da•o namkalengaha ine Mongolbar salo, Khliehriat-ni MLA aro Meghalaya a•dokni Cabinet Minister Kyrmen Shylla parakataha.
Koborko on•ani gitade, Iapmala songo gital bilsiko maniani bak gita jinma ale cha•ani ja•man komibeoba sak 160 manderang, chisatna aro ja•man ok re•ruruna a•bachengahachim. Saa man•gipa manderangko ja•mano sanna gita Khliehriat CHC-ona ra•angaha indiba da•o saa man•gipa manderangoni bang•batan namkalaha ine Khliehriat-ni MLA parakataha.
Shylla-ni parakatani gitade, saa man•gipa manderangoni mitamko hospital-o sanne mitamkode medical dolni manderang an•tangtangan songona re•angkame sannaniko on•aha.
Da•o ia health centre-o sak 11 ba sak 12-mangde dongkuenga indiba uamangko Budbar salon watpilgnok ineba MLA parakataha.
Jinma ale cha•ani somoio manderangna on•gipa cha•anirangko am•sandina gita official-rang ra•angaha ineba Shylla parakataha.
