Tura, Jan 25: Ma•mong sorkarini ra•gatgipa Pradhan Mantri Bharatiya Jan Aushadhi Kendra (PMBJAK)-ko Sombar salni bako West Garo Hills a•jani Tura Civil Hospital-oba kuliahani gimin da•o Garo Hills-ni manderang aro mongsongbate kangal cholgri ong•pagipa manderangba, ramram samrangko komia damrangko bree jakkalpana man•gnok.
Tura-o ia Jan Aushadhi Kendra-ko kulie on•angani somoio North Tura-ni MLA aro Chief Minister-ni Adviser Thomas A Sangma jinmana aganprakangengon, ia Jan Aushadhi Kendra-ko kulianichi jolo songdongenggipa manderang aro mongsongbate kangal cholgrirang da•o ramram samrangko dam komiao bree jakkalna man•e namgnirangko man•gnok ine parakangaha.
Jan Aushadhi Kendra-ko 2008 bilsini November 25 tariko New Delhi-ni Shastri Bhavan-o kulichengahachim ine parakatengon, 2014 bilsiona kingkingan iandake dam komiani sam dokkanrangko a•song gimiko dam 80-mangkosan nikna man•engkuachim indiba da•o Jan Aushadhi Kendra-rang a•song gimiko dam 7000-na baten dongaha aro Meghalaya a•dokoba ian chetgipa ong•engaha ine North Tura-ni MLA parakataha.
Manderangna namgipa samrangkoba dam komie tarina nangenga ine janapatengon, a•dokni Chief Minister Conrad K Sangma-ni dilanichi MDA sorkari, a•doko songdongenggipa manderangna an•seng baljokanirangko on•na kam ka•engani gimin ua mikkangchi iandakgipa sam dokkanrangko a•dokni pilak kona noksikrangon kulina gita rake kamrangko ka•gen ine Thomas Sangma ku•rachakangaha.
Ia PMBJAK Tura Civil Hospital-o kulie on•angani somoio West Garo Hills a•jani Deputy Commissioner Ram Singh, Tura Municipal Board-ni Chairman JD Sangma, Health Services-ni Joint Director aro Tura Civil Hospital-ni Superintendent Dr Minakshi A Sangma, West Garo Hills a•jani District Medical & Health Officer Dr Marwin R Sangma aro Tura Civil Hospital-o kam ka•enggipa gipin manderangba dongpae bak ra•angaha.
