Shillong, Oct 16: Shillong songjinmani U Soso Tham Auditorium-o salgnina ong··tanggipa Tri Hills Ensemble-ko mija Sonibar salo Meghalaya a·doko songdong-a·chachenggipa jatgittamni daka-rikanirangko dakmesokachi, chrok-mesaaniko ong·atachi aro gitrangko ring·angachi matchotataha.
Programo, a·dok-chigana aro jatna kamko ka·anggipa chengoni matgrikrangni janggi tanganirangko kan·dike mesokanirang baksana, jatni chrokanirang jekai, Ri-Bhoi-oni Jabolo, Wahkhen-ni Shad Ngoh Krai aro Shad Miet Raid Mawja, iandakgiparangko chrokange, batanggimin bilsi 50 rango a·doko songdongchenggipa jatgittamrangni dakbewal-rikbewalo, janggi tangbewalanio dal·rorobaani gimin film aro noksarangko mesoke, doka-damanirangko ong·ate ia programko dingtangmanchae ong·atangaha.
Salgnina ong·atgipa programo, North East Initiative Department Agency-ni susaaniko ong·atanggipao songjinmani dingtang dingtang skuloni chatro-chatrirang bakko ra·angtokaha aro chegipana Chief Eletoral Officer (CEO), F R Kharkongor-ni jakchi boksisrangkoba on·angjolaha.
Pahambir songoni jakmatangchi rokom-rikkit dake bimang tarina changgipa manderangchi songoni manderangni chengoniko ja·rikbagipa daka-rikanirangkoba manderangna mesokangaha.
Meghalaya a·doko music ba doka-damanirangni a·bachengbaaniko adita talate on·anga baksa, ia salgnina ong·atgipa programko ‘Songs of Gold’ ine donenba jatni mingsinggipa gitrangko ring·e mesokangachi matchotataha. Unbaksana, a·dokoni saksa niksenggipa singer Rana Kharkongor sagini demechikrang, Maphi aro Mana Kharhunai-maangba pagipani a·dokna aro songsalna nama kamrangko done re·anganiko gisik ra·atpile aro una dingtangmancha on·kange uni segipa git ‘Miet Shai Bnai’ ingipako ring·e mesokangjolaha.
Iana agreba, a·dokoni da·ororo chasongni git ring·gipa dol Lamphang Syiemlieh aro Summersalt iamangchi “Kamai La Ka Hok” aro “Mluh” ingipa gitrangko ring·angachi bon·kame, programo bakko ra·gipa aro nigipa mande sakantikoba an·saodilangaha.
