Shillong, Dec 30: Adita salrangna skang, Prime Minister Narendra Modi-ni Shillong-ona re•baani somoio uko ganatgipa Khasi jatni gandingko TMC-ni dilgipa aro India-ni gitcham cricketer Kirti Azad-ni chonnike aganahani gimin jegale Sukrobar salo Hynniewtrep Integrated Territorial Council (HITO) dolni gita dingtangmancha jinma re•jomaniko Shillong songjinmao ong•atangaha.
Ia jinma re•jomaniko dingtangmancha U Kiang Nangbah-ni chang 160-gipa siani salko gisik ra•ani bak gitaba ong•atangaha.
Jinma re•jomaniko a•bachengna skang tom•aniko ong•atanio HITO-ni president Donbok Dkhar, jinmana aganprakatengon, Khasirangni gandingko Kirti Azad kragija bewalo aganahani gimin jegalna gita ia jinma re•jomaniko ong•ataha ine parakataha.
Khasirangni mikkim rasongko gipinrangna mesokna gita ia re•jomanio HITO-ni membor-rang, jattangni ganding chindingrangko gane bakko ra•aha ineba ua parakataha.
Jatni gandingko chonnikahani gimin ua Kirti Azad-ko Khasirango kema bi•china gitaba dabiangaha.
