Williamnagar, May 18: A•chik a•songni namgnina Garo Hills Autonomous District Council (GHADC)-o Service Rule, Financial Rule aro dingtang Electoral Roll-ko tarichina dabiengon, ia dabianirangko chu•sokatjagenchimode GHADC-ni kosako jingjengatanirangko dakanggen ine East Garo Hills a•jani Niksamso Garo Community Organisation (NGCO) ka•mikkenataniko on•angaha.
NGCO-ni parakatani gitade, A•chik a•songni namgninasa ia dabianirangko NGO-rang dabiengachim indiba ia dabianirangko GHADC-ni dilgiparang chu•sokate on•na gisik nangjaengachim.
“A•chik a•songni aro jatni namgnina kamko ka•gen ine election-ni somoirango MDC-na susagipa manderang ku•rachakronga indiba seokako man•ahaode an•tangtangni ku•rachakanirangko gualronga aro kamtangtangko chu•sokatrongja. Election sepango politics kal•e jatko tol•damaniko chingna nangja,” ine NGCO-ni dilgiparang parakataha.
A•chik a•songni namgnina dabianirangko aro jat gimikni nangnikaniko chu•sokate on•na gisik nangjaode nie dongchajawa aro kamrangko ka•na on•jawa ine janapatengon, dabigimin kamrangko chu•sokate on•jaode office-rangko chipe donatgen ine NGCO parakataha.
