Tura, Dec 5: Jengjal jolrango songdongenggipa manderangni ru•utbea bilsirangna dabianiko chu•sokate on•na gita Sombar salo, Jengjal Civil Sub-Division-ko kulie on•ahani gimin Meghalaya a•dokni Chief Minister Conrad K Sangma-ko jolni MLA aro a•dokni Health Minister James K Sangma mittelpilangaha.
Ia apsan salon, Jengjal-o Integrated Health Complex-ko rikna gitaba pangchakaniko songe on•angjolahani gimin ua an•tangni kusi ong•aniko parakatjolaha.
Jengjal Civil Sub-Division-ko kulie on•angani somoio jolni MLA aro a•dokni Health Minister-ba dongpae, jinmana aganprakangengon, ian Jengjal jolo songdongenggipa manderangna gisik ra•beani sal ong•enga ine parakatenba, Jengjal-ko Civil Sub-Division songe on•ahani gimin a•dokni Chief Minister Conrad K Sangma-ko mittelpilangaha.
Jengjal-koba da•o Civil Sub-Division songahani gimin jolni manderang, biaptangon donge sorkarini kamrangko ra•na man•gnok ineba ua parakataha.
Jengjal Civil Sub-Division-ko songanichi chadamberangna bang•en kam ka•e cha•ani cholrang donggnok ine talataniko on•angengon, ia sub-division-ko da•osa songchengahaoba ian mikkangchi chasongni chasongnan jolo namroro silroroaniko ra•bana pangchakani ong•gnok ine Sangma parakataha.
Jengjal-o Integrated Health Complex-ko rikna siengani gimin an•tangni kusi ong•aniko parakatengon, Jengjal jolara Garo Hills bijangchi gita ong•e ia biapo Integrated Health Complex-ko kulianiara pilak biapni manderangnan namgni ong•gnok ine a•dokni Health Minister parakataha.
