Shillong, Feb 24: Jaintia Hills Autonomous District Council (JHADC) election-o dam 13 seat-rangko chena man•ahani gimin National People’s Party (NPP), gital Executive Committee (EC)-ko chalaina tik ka•angaha.
Indake ong•genchimoba, Khasi Hills Autonomous District Council (KHADC) election-ode seat dambrikosan cheskana man•aiahani gimin NPP-ni dilgiparang, iani bidingo nipiltaina tik ka•angaha.
Sombar salo, MDC election-ni result-rangko parakatani ja•man kobor ra•timgipa manderang baksa agangrikengon, Sombar attamon NPP-ni dilgiparang apsan asongenba, JHADC-o gital EC-ko chalaiani bidingo chanchianggen ine NPP-ni ku•wattimgipa HM Shangpliang parakataha.
JHADC election-o gimik dam 29 constituency-oni dam 13 seat-rangko chee, bang•bate seat-rangko chegipa party ong•aha ine janapatengon, apsan bakrime kam ka•na sikenggipa dolrang baksa NPP, gital EC-ko rikna miksongenga ine Shangpliang aganaha.
Meghalaya Democratic Alliance (MDA)-o bakrimenggipa dolrang dongani gimin uamang JHADC-oba NPP baksa apsan bakrime EC-ko rikna miksongenga ineba ua aganaha.
NPP-ni sak 13 candidate-rangko seokahani gimin ua dingtangmancha Jaintia Hills-ni manderangkoba mittelpilangaha.
KHADC election-o seat dambrikosan chena man•aiahani gimin janapatskaengon, ia election-o chu•sokna man•jahani gimin constituency ge•antionikon uamang a•selrangko nipilanggen ine NPP-ni dilgipa aganaha.
KHADC election-o NPP, gimik sak 25 candidate-rangko susaatahachim indiba uamangoni sakbrisan seokako man•aiahachim ine nikna man•a.
KHADC-ni ning•o donggipa constituency ge•antini manderangko mittelpilangskaengon, jeko manderang namnike seokaha uko NPP mande ra•a aro mikkangchiba uamang, pilak gadangni manderangnan dangdike on•angkugen ine Shangpliang aganaha.
KHADC-o NPP, apsan bakrimgipa dolrang baksa opposition ong•e asonggen aro iachi manderangna dangdike on•angskagen ineba ua aganaha.
Na·simang ia video-koba nina man·gen:
Na·simang iakoba poraina man·gen: Rambrai-Jyrngam constituency-o Independent candidate cheanina sima jolni manderang kusi ong•aniko paraka
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
