Tura, June 18: Mongolbar pringni bako, ta•rakbegipa balwarang baksana mikka kimpreprete waani a•sel, Garo Hills a•jani dingtang dingtang bakrango chi banna re•aniko nikna man•aha.
East Garo Hills a•jani Williamnagar songjinma aro West Garo Hills a•jani a•kawe jolrango bilongen mikka jimbee waanichi adita songrangko chi mripatako man•an baksana badiaba biaprangode a•arangba ruangaha.
Indake, West Garo Hills a•jani Selsella songko, chi banna re•anichi mripatako man•aha aro ia songni manderangko, sorkarini dongchakna tarigimin biaprangona jitataha.
West Garo Hills a•jani Deputy Commissioner Jagdish Chelani, chi banna re•anio nangchakea man•gipa manderangko sorkarini skul nok aro community hall-rango, chirang komiangkujana kingking dongen aro una agreba a•jao dam 340 biaprang gnang jekon nangchongmotgipa somoirango jakkalna man•gen ine aganaha.
Tura songjinmani adita bakrangoba a•arang ruaha, indake ong•genchimoba, manderangna maming kenchakanirangde dongja ineba ua agandapataha.
Remal balminduri ong•ani ja•mano, Mongolbar salo mikka balwa ta•rakanganianiara, da•ororo ni somoiode bilakbatsranggipa ong•achim. Ia mikka balwa ta•rakgnini bidingo, State Disaster Management Authority-ni gita, songdong a•chaenggiparangko simsake dongchina mikrakatanikoba on•atahachim.
Ia changni mikka balwa ta•rakanio goera gopretanirang bang•bata ine u•ina man•aha. Iani gisepon, Deputy Commissioner-ni dongchakenggipa nokmikkangni silongket bolba goera gopreta man•e nosto ong•atako man•aha.
North Garo Hills a•jao, Resubelpara-ni Dekachang sub-way-ko mini pickup truck bolsa re•batangengmiting somoi chi banna re•gipa chiona bikpile ga•akaha. Ia rama Mendipathar-oni Resubelpara-ona re•a doanina jakkalna nangchongmotgipaba ramaba ong•achim.
Ia ramarang namjani a•selo aro rama jal•langrangko tarina chamatgiminko construction company-rangni chu•soke tarie on•jani a•sel bi•sarangba skulona sokangna man•jaenga aro office-ona re•enggiparangba neng•nikaniko man•enga ine ua jolo donggipa saksa matnange aganaha.
East Garo Hills a•jani Williamnagar sonjinmaoba, Simsang chibima ditdoe dal•ani a•selo adita biaprango chi banna re•aniko nikna man•aha.
Ia jimbegipa mikkarang waani a•sel, chiring chibimarang ditdopretbaenba, Ku•simkolgre jolrango bilongen chi banna re•aha.
South Garo Hills a•jaoba, Simsang chibimani ditdoani a•selo, Bangladesh-ni a•kawe jolrango bilongen chi banna re•aniko nikatna man•aha aro Simsang chibimani chibipekoni jokanggipa chirang sepangbatgipa gipin a•songrangona jokbrinangskaaha.
Ia mikka balwa ta•rakanio Garo Hills a•jaoni darangba saknaatanikode man•jaha.
Na·simang ia video-koba nina man·gen:
Na·simang iakoba poraina man·gen: Mongmarangoni naljokaniko on•jaengani songni manderang rama champenge jingjengata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
