Shillong, Dec 26: District-ni gadango an·tangko ra·chakja ine pa·sikenba, South Tura constituency-ni gitcham MLA John Leslee K Sangma, Bharatiya Janata Party (BJP)-oni ong·kataha.
Iani bidingo BJP-ni state president Ernest Mawrie-na chitti sedoe u·iatengon, ua BJP dolna kamko ka·na miksonge party-o napahaoba uko district-ni gadango ra·chaktokjahani gimin ua BJP-oni ong·katpilna nangnikaha ine Sangma parakataha.
South Tura-ni gitcham MLA John Leslee Sangma, June jani 29 tariko, BJP-ni sakgni MLA, chong·motan Sanbor Shullai aro AL Hek baksana BJP-ni gipin state executive membor-rangni mikkango BJP-o napahachim ine nikna man·a.
Sangma-ni parakatani gitade, joltangtango namroro silroroaniko ra·bana BJP-ni membor sakantinan cholko on·gen aro membor sakantinan apsan cholko on·gen inesa ua BJP-o napahachim.
“Indiba obostarang indake ong·jaha ine anga nikahani gimin anga BJP baksa kamko ka·rimna man·jaengaha aro December-ni 20 tarik dipet BJP-oni ong·katna ia chittiko on·enga,” ine Sangma, BJP-ni state president-na sedoatgipa chittio parakataha.
Re·baenggipa 2023 bilsini Assembly election-o ua, Meghalaya a·dokni Chief Minister aro South Tura constituency-ni MLA Conrad K Sangma baksa South Tura constituency-oni susagrikna siengachim.
