Shillong, Sep 13: Jowai district jail-oni joke katgipa koidi saksa Rikmenlang Lamare-koba Mongolbar salo, Barato jolni Village Defence Party (VDP) aro Hynniewtrep Integrated Territorial Organisation (HITO)-ni member-rang rim•e on•pilna man•aha.

Ia koidiko VDP aro HITO-ni member-rang, Mongolbar pring 11:00 bajimango rim•aha aro ja•mano West Khasi Hills a•jani police department-na pakwate on•ataha.

Koborko on•ani gitade, Jowai jail-oni joke katgipa koidi Rikmenlang Lamare, ia jolo dongnue dongenga ine koborko man•soani ja•man, VDP-ni secretary Resto Sten baksana HITO-ni member-rang, uko sandienba rim•na man•aha.

Re•anggipa Sonibar salo, Jowai district jail-ni sakdok koidirang, jail-o nitimenggipa sipairangko chadrapenba, joke katna man•ahachim indiba ia sakdok koidirangoni sakbrikode Robibar salo, West Jaintia Hills a•jani Shangpung jolo songdongenggipa manderang, jinma chadrape so•otahachim. Bongagipa koidi Ramesh Dkhar-de, manderangni chadrapaoni joke katna man•ahachim indiba uko police-rang, Sombar salo rim•pilna man•skaahachim.