Jowai, Dec 20: E-Shram-ni bidingo jolo songdongenggipa manderangna talate on•na gita Sombar salo, West Jaintia Hills a•jani District Labour Office baksana All Jaintia Muster Roll Workers & Labour Union Jowai unit aro West Jaintia Hills a•jani Common Service Centre nangrime, awareness program-ko Jowai-o donggipa Tympang Iawmusiang-ni Dorbar Chnong office compound-o ong•atangaha.Ia program-ko ong•atanio West Jaintia Hills-ni Labour Inspector B Toi, tom•anio bak ra•giparangna aganprakengon, hajira kam ka•e cha•enggiparangna ra•gatgipa E-Shram-ni miksongani aro namgnirangko talate on•angenba, E-Shram-ni ning•o an•tangtangko biming segatna nangani gimin aganangaha. Ia tom•anio West Jaintia Hills CSC-ni District Manager M Myrchiang-ba jinmana aganprakengon, a•jao donggipa dingtang dingtang common service centre-rango an•tangtangko biming segatchina gita hajira kam ka•e cha•enggiparangko didiangenba, iana Aadhar card, Bank passbook aro Aadhar-na biming segatanio jakkalgipa phone nombor-ko sakkina on•na nanga ine talataniko on•angaha.Ia program-ko ong•atanio All Jaintia Muster Roll Workers & Labour Union Jowai unit-ni advisor KL Pariat-ba jinmana aganprakengon, japrako gong 15,000-na komibate man•enggipa pilak manderangan ia E-Shram-ni ning•o bimingko segatna man•gen ine ia bilsini August jaon India sorkari parakmanaha ine jinmana talataniko on•angaha.

Ia E-Shram-ni ning•o biming segatgiparang, a•sel ong•anio be•enni gita pangna jolna cholgri ong•atako man•genchimode gong lak 1-ko man•gen aro a•sel ong•anio sigiparangde gong lak 2-ko man•gen ineba ia tom•anio official-rang talate on•angaha.