Shillong, Aug 18: Shillong songjinmao da·o tom·tomaniko man·pilna a·bachengengahaon, Budbar salo Meghalaya a·dokni Chief Minister Conrad K Sangma, ‘Sur Ki Nong Mawlai’ (Mawlai-o songdongenggipa manderangni ku·rang) dolni dilgiparangko Shillong-o grongenba, judicial inquiry-ko dakna on·china mol·molangaha.
Ia ‘Sur ki Nong Mawlai’ dolo jolni MDC baksana gittimko dilgiparang aro Mawlai jolo donggipa dingtang dingtang dolni dilgiparangba dongpaahachim.
HNLC bobil dolni gitcham dilgipa Cheristerfield Thangkhiew-ko police-rangni so·ote galani gimin Shillong songjinmao adita so·sojengjeng ong·angani ja·man a·dok sorkari, curfew-ko ra·gatangahachim.
Budbar salo curfew-ko pring 6:00 bajioni attam 4:00 bajiona ra·galataha indiba jinma tom·anirangko daknade on·skakujaengachim.
HNLC-ni gitcham dilgipako police-rang skatangsa so·ote galaha ine Mawlai jolo donggipa dingtang dingtang dolrang matnangtokengani gimin sorkari, iani bidingo tale ma·sina gita inquiry committee-ko dakchina ge·etangahachim.
Judicial inquiry-ko dakchina ge·etani ja·manoba Mawlai jolo songdongenggipa manderang, ia inquiry-ko ra·chakna siktokjaengani gimin judicial inquiry-ko dakna on·china a·dokni Chief Minister, Mawlai jolni dilgiparangko didiangaha.
Shillong-o tom·tomaniko ra·bapilna man·na gita sorkari baksa bakrime kamko ka·china gitaba ua ‘Sur ki Nong Mawlai’-ni dilgiparangko didiangaha.
Ia tom·anio Meghalaya a·dokni Deputy Chief Minister Prestone Tynsong, Cabinet Minister H Dohling aro sakgipin Cabinet Minister R Tongkhar-ba dongpae bakko ra·angaha.
