Guwahati, May 3: Assam Assembly election-o Bharatiya Janata Party (BJP) chepiltaiani ja•man da•o Himanta Biswa Sarma-ni a•tiponiba uko Assam-ni gital chief minister songchina paraktokahani gimin CM-ni biapna susaanio adita ding•chaogrikaniko nikna man•skaengaha.
Assam Assembly election-ni result-ko parakatani salsa ja•man, Karbi Anglong-o gital seokako man•gipa MLA sakbonga, Sarma-ko Assam-ni gital chief minister songchina nangnikenga ine paraktokaha. Karbi Anglong-ni chief executive membor Tuliram Ronghang-ni dilanichi ia sakbonga MLA-rang, Sombar salo Himanta Biswa Sarma-ko uni noko gronge iani bidingo agangrikangaha. Ia apsan salon, Himanta Biswa Sarma-ni a•tiponi gipin MLA-rangba uni nokona sokbana a•bachengtokaha.
United Peoples Party Liberal (UPPL)-ni gital seokako man•gipa sakdok MLA-rangba ia attamon Sarma-ko uni nokona re•ange grongna miksongtokenga.
Assam a•dokko nirokenggipa BJP-ni dilgipa Baijayant Jay Panda-ba Sarma-ko Sombar pringo uni nokona re•ange grongeaha.
Assam Assembly-ni gimik dam 126 seat-rangoniko ia chang Assam election-o BJP-chi dilenggipa NDA, dam 75 seat-rangko cheahachim. Ia election-o BJP doltangarian dam 60 seat-rangkode cheaha aro uandaken 2016 bilsini election-o gitan seat-rangko cheriktaina man•aha.
BJP dol baksa bakrimenggipa Asom Gana Parishad (AGP), 2016 bilsio dam 14 seat-rangko cheahaoba ia changode dam 9 seat-rangkosan cherikskaaiaha.
Assam Assembly election-o skanggipa changna susaanggipa UPPL dolba ia election-o dam 6 seat-rangko cherikaha.
