Shillong, Dec 2: Kashmir a·doko kamtangko ka·engmiting somoio so·otako man·gipa 59th Field Regiment-ni havildar Hempiar R Marak-ni manggisiko, North Garo Hills a·jani Mendipathar jolo donggipa uni Salpara songona ra·bae mande ra·bea gnang gope galaha.

A·songtangko warachakna dangdike on·engmiting somoio so·otako man·gipa A·chik sipaina uko gopna skang, ritchani ritcha manderang, una bon·kame mande ra·pilskaaniko dakenba, gope galaha.

Havildar Hempiar R Marak-ara Field Regiment-ni saksa sipai ong·e Kashmir a·dokni Line of Control (LoC)-o Pakistan a·songoni niam gri napdrabae chadrapaniko warachaksoengachim aro uni a·songtangko warachakengmiting somoio ua November 28 tariko so·otako man·na nangahachim.Uni manggisiko Indian Army-ni sipairang, Budbar walo uni songtang Salpara-ona ra·baaha aro uandaken uni manggisiko Bristibar salo, mande ra·aniko dakenba ia apsan songon gope galaha.

Meghalaya a·dokni Chief Minister Conrad K Sangma-ba uni a·songtangna dangdike on·anio janggitangko gimaatna nangahani gimin an·tangni kalimpaaniko parakataha.

“Kashmir a·dokni LoC-o kamtangko ka·engmiting somoio so·otako man·na nanggipa Havildar Hempiar R Marak-ni nokdangna anga an·tangni kalimpaaniko parakatenga. Uni manggisiko da·al North Garo Hills a·jao donggipa uni songtangon gope galenga. Uni a·songtangna an·tangko on·kangahani gimin anga uko salam ka·a,” ine Chief Minister, social media-o parakataha.