Shillong, Jan 28: Indian Constitution-ni Sixth Schedule-ko taridapanio Khasi Hills Autonomous District Council (KHADC) aro Garo Hills Autonomous District Council (GHADC)-na dam 40 ka•e seat-rangko on•e, Jaintia Hills Autonomous District Council (JHADC)-na dam 32 seat-rangko on•china Meghalaya sorkari ku•pattiangaha.
Da•o dipet ia damgittam Autonomous District Council (ADC)-rangon dam 30 seat-rang donga, jeonin dam 29 seat-rangnade dilgiparangko jinma seokenba, seat damsanade dilgipako songe on•engachim.
Da•o Sixth Schedule-ko taridapna ku•pattianiode KHADC aro GHADC-o dam 40 seat-rangko done, ia dam 40-oni dam 36-nade election-ko ong•atenba, dam 4-nade dilgipako songskaani ong•enga indiba JHADC-nade dam 32 seat-rangko donskae, ia dam 32-oni dam 30-na election-ko ong•atenba dam 2-nade dilgipako songskaani ong•enga.
Sukrobar salo, Sixth Schedule-ko taridapani bidingo Cabinet tom•ani ja•man iako a•dokni Chief Minister Conrad K Sangma parakataha. Indian Constitution-ni Sixth Schedule-ko taridapna gita a•dok sorkarini ku•pattianirangko da•o India sorkarina watdoatgnok.
Village council-rangko songani bidingo Cabinet-ni chanchianiko parakatskaengon, village council-ni secretary-ko man•chape council-ko jinma seokchina gita sorkari proposal-ko on•enga indiba village council ge•antion chairman-de songni nokni Nokma-sordarrangan ong•na nanggen ine Chief Minister parakataha.
“Dingtang dingtang niamrango pangchake, village council-ni membor-rangkoba jinma seokgen indiba village council ge•antion chairman-de Nokma-sordarrangan ong•gen. Sixth Schedule-ko taridapna chanchianio ia minggni kamrangsan bangki dongkuengachim,” ine Sangma parakataha.
ADC-rangko man•chape dingtang dingtang dolrang baksa chanchirimchengani ja•manosa a•dok sorkari ia ku•pattianirang tariaha aro ia ku•pattianirangko adita salrangni gisepon India sorkarina watatgnok ineba Chief Minister parakataha.
Indake ong•engon, Sonibar attamo ua Assam-ni Chief Minister Himanta Biswa Sarma-ko Guwahati-o gronge a•dok damgnini simarango meligrikna man•jaenggipa damdok biaprangni gimin bon•kamgipa changna agangrikanggen ineba a•dokni Chief Minister Conrad Sangma parakataha.
