Shillong, Feb 1: Khasi Hills Autonomous District Council (KHADC)-ni dingtang dingtang nanganirangna gong crore 46.27-ni vote of account-ko jagittamna Budbar salo, KHADC-ni chief executive membor Titosstarwell Chyne, mesoke on•angaha.
Ia gong 46,27,16,190 ong•gipa vote of account, ia bilsini April 1 tarikoni June 30 tarikona ong•gen.
KHADC-o council budget session-ni skanggipa salo ia vote of account-ko mesoke on•angengon, April 1 tarikoni June 30 tarikona dingtang dingtang department-rang, dingtang dingtang nanganirangna tangka paisarangko gamna man•gen ine Chyne parakataha.
Ia gong crore 46.27-oniko General Administration Department-na gong 9,29,73,230, Law Department-na gong 15,37,630, Revenue Budget & Finance Department-na gong 2,11,70,910, Forest Administration Department-na gong 2,38,94,710, Administration of Justice & Judicial Department-na gong 1,45,17,810, Legislative Department-na gong 1,86,66,370, Education Department-na gong 3,40,370, Civil Works & Development Department-na gong 27,53,18,430 aro Enforcement Scheme for protection of Tribal Land & Interest-na gong 1,42,96,730-ko chamenga ineba KHADC-ni CEM parakataha.
Salgnina ong•atenggipa KHADC-ni budget session-ko da•o March-ni 6 tariko ong•atangskagen aro ia gnigipa salo, vote of account-ko pass ka•anggen.
