Shillong, May 8: April 30 tarikoni May 3 tarikona New Delhi-o gnigipa changna ong·atanggipa Khelo Master Games Foundation National Championship-o Meghalaya a·dokoni re·ange katsusaanio bakko ra·egipa Darisuk Kharwanlang, Silver aro Bronze Medal-ko chena man·aha.

Bilsi 48 ong·gipa Darisuk Kharwanlang-ara, Sohra jolo donggipa Mawmluh songoni ong·achim aro uan bi·sa sakchetni ma·gipaba ong·achim. Ua 100 metre relay race-o silver medal-ko cheaha aro 400 metre race-o bronze medal-ko cheskaaha.

Kal·susaa matchote Shillong-ona sokbapilani ja·man Hub News baksa agangrikengon, ua skul napmiting somoirangonin kal·susaanio bakko ra·na a·bachengaha aro dingtang dingtang ra·bianirang donggenchimoba ua an·tangni kal·susaaniko watgalgija an·tangni kal·susaaniko nambatatna krengaha ine Darisuk parakataha.

Darisuk-ni aganani gitade, ua Goa, Delhi aro Guwahati songjinmarangonaba re·ange kal·susaanirango bakko ra·eaha aro medal-rangko chena man·aha.

Meghalaya a·doko kal·susagiparangna cholrang dongjani gimin an·tangni suk ong·gijaniko parakatengon, mikkangchi a·dokna aro jatna mikkim rasongko ra·bana man·na gita kal·susagiparangnaba dingtang dingtang cholrangko aro biaprangko tarie on·china gita Darisuk, Meghalaya sorkariko didiangaha.

Re·anggipa bilsio ua Malaysia a·songona re·ange kal·susaanio bakko ra·pana gita cholko man·ahani gimin dakchakanirangko on·china gita Sports Minister-ko grongeahachim aro Sports Minister-ba una dakchakanirangko on·na ku·rachake nomborko ra·rikahachim indiba ua sports minister ba sports department-oni phone ka·atanikoba ua changsaba man·sojaha ineba Darisuk an·tangni suk ong·gijaniko parakataha.

Iandake dingtang dingtang neng·nikanirangko ua chagrongna nangengoba, da·o re·baenggipa jarango Rajasthan a·doko ong·atna sienggipa kal·susaanio bakko ra·na git aua an·tangko tarisamsoenga ineba Darisuk parakataha.