Shillong, June 18: East Jaintia Hills a·jani Sutnga jolo donggipa koela a·kolo gimaenggipa gipin manderangkoba Indian Navy-ni sak 12 sipairang, sandina gita rakbee kamrangko ka·engkua.
Meghalaya sorkarini okamatako man·e Indian Navy-ni diver ba chi ripgipa sipairang, re·anggipa June 12 tarikonin sandina a·bachengahachim aro uandaken ia koela a·kolo gimagipa manderangoni saksani manggisikode adita salrangna skangsan koela a·koloniko ra·ongkatna man·ahachim.
Da·ororo salantian mikkarang waengani a·sel koela a·kolo chirang gape, koela a·kolo gimaenggipa manderangko sandianio neng·nikanirangko man·engoba Indian Navy-ni chi ripgipa sipairang, ia koela a·kolni feet 400-mang ong·pile ning·tuaona napange koela a·kolo gimaenggipa manderangko sandienga ine u·iataha.
Ia koela a·kolo Indian Navy baksana NDRF, SDRF, DDRF, Fire & Emergency aro police-rangba dongkame gimaenggipa manderangko sandianio kamrangko ka·engachim.
