Guwahati, June 17: Assam a•dokni Bodoland Territorial Region-ni ning•o donggipa Kokrajhar a•jao me•chik bi•sa sakgniko drae til•ekani ja•man so•ote galanio mongsonggipa ong•e matnangako man•enggipa Farijul Rahman-ko Budbar walo, joke katna jotton ka•engmiting somoio uni ja•ao goaha ine police-rang u•iataha.
“Me•chik bi•sarangko drae til•eke so•ote galanina matnangako man•enggipa manderangoni saksa, Salbari Bedlangmari samba jolo police-rangni sandiengmiting somoio joke katna jotton ka•ahani gimin police-rang uko uni ja•ao gona nangaha. Goako man•e ia mande saknaanirangko man•aha aro da•o hospital-o sannaniko ra•enga,” ine Bristibar pringo law & order-ni additional DGP GP Singh parakataha.
Ja•ao goako man•ani ja•man, bilsi 22 ong•gipa Farijul-ko km 50-mang chel•ao donggipa Barpeta-ni Fakhruddin Ali Ahmed Medical College & Hospital-ona ra•angaha.
Re•anggipa June-ni 11 tariko Kokrajhar-oni km 20-mang chel•ao donggipa Abhayakuti songni me•chik bi•sa sakgniko drae til•ekenba so•ote galahani gimin mande saksniko police-rang June 15 tariko rim•aha aro goako man•gipa Farijul-ba ia saksnioni saksa ong•paachim. Ia me•chik bi•sa sakgnini manggisiko uamangni nok sambao donggipa bol pangsaosa dingdee dongako man•ahachim.
Assam-ni Chief Minister aro Home Minister Himanta Biswa Sarma-ba ia a•sel ong•gipa biapona re•ange ia a•selni bidingo ta•raken am•sandichina gita police-rangko ge•etangaha.
