Shillong, Sep 25: Khasi Students Union (KSU), a•doko Inner Line Permit(ILP)-ko ra•gatchina, Citizenship Amendment Act (CAA)-ko watchangchina, Eighth Schedule-o Khasi ku•sikko napatchina, Indo-Nepal Friendship Treaty, 1950-ko watchanggalchina, sima ario nanggrikanirangko sandie nirokatchina aro Central Agricultural University-ko rikkame on•china mol•mole, 6-points memorandum-ko Meghalaya-ni Governor, CH Vijayashankar-na on•angaha.
KSU-ni General Secretary, Donald V Thabah, Meghalaya a•doko ILP-ko ra•gatna nangengani gimin janape seanirangko ma•mongona sokatahachim, indiba, ma•mong sorkarioni aganchakaniko da•onaba man•sokujaenga ine uamangni on•gimin memorandum-o janapataha.
Meghalaya a•dokba, Tripura aro Assam a•dokrango gitan ong•baengaha maina, a•doko song•dong a•chakamenggipa manderangko gipin a•dokoni re•bae niam gri songdongenggipa manderangsa ganggopna jotton ka•skaengjok. Uni gimin, songdong a•chakamenggipa manderangni naljokanina aro unbaksana songdong a•chaenggipa manderangni gisepo tom•tomaniko ra•bana ILP-ko ra•gatna nangchongmotenga ine janapataha.
CAA, 2019 act-oniko watchanggalchina mol•molatengon, ia act-o sepangbatgipa a•songni manderangko songdongna on•anikoba man•chapaha, indake ong•engon a•dokna bang•a neng•nikanirangko ra•bagen. 1971 bilsio Bangladesh Liberation War ong•gipa somoioni da•alona Bangladesh-oni niamgri napsrukbae songdong a•chagiparang gnang aro 1971 bilsionin, songdongkamenggipa manderang aro napsrukbaenggipa manderangni gisepo nanggrikanirangko nikna man•baengaha. Indake ia act-ko watchanggalchina dabiengon, uamangni jat aro toromni kosako namnikgijaniko mesokenga ong•jaenga, indiba, songdongkamenggipa manderangna kenchakani ong•engani giminsa janapatenga ineba ua janapataha.
Minggipinara, Indo-Nepal Friendship Treaty, 1950 act-oniko Meghalaya a•dokkode watchanggalchina Governor-o mol•molanian ong•achim.
CAA gitan Indo-Nepal Friendship Treaty, 1950 act-ba, India a•songona napbagipa Nepali-rangko India-o songdonggipa ine changipa ong•achim. 1980 bilsimangoni intal, a•dokona Nepali jatrang re•bae aditan jelbra jelsuna a•bachengengjok, jean, jatgni ba dolgnini gosepo nanggrikanirang ong•rongenga aro iasan ong•aigija, adita a•ani bilrangko on•china dabie sima ari jolrango so•sojengjeng ong•atanirangkoba nikna man•enga.
Indake, Meghalaya aro Assam a•dokrangni sima arijolrango jingjenganirangni bidingo janapengon, sima arini je jolrangan Khasi jatrangko dilgiparangni ning•o ong•engachim, uarangko Meghalaya a•dok ning•on man•chapatchina gita a•dok aro mamong sorkari dolgnian name nirokataniko dakchinaba ua mol•molataha. .
1972 bilsio, Assam-oni Meghalaya a•doko ma•ekata dipetan, sima ari jolo donggipa a•arangko, a•dok damgnian a•kanganiko dakbaengaha jeni a•selan bang•a dosgri manderang janggitangko gimaatna nangao ga•akenga ine janapan baksa, Assam a•dokoni bang•en dingtanggrikgipa jolrang gnang, jekai, Langpih, Block I, Block II, Khanduli, Psiar, Moolber, Moojem, Sabuda, Nongwah-Mawtamur aro uandake gipin biaprang, Meghalaya a•dokni bakrang ong•a jean Khasi jatrangko dilgiparangni a•king ning•o ga•aka ineba Thabah talataha.
Ia Meghalaya a•dokko bimang ong•ataniara, Khasi-Jaintia Hills aro Garo Hills-o songdongkamenggipa tribal manderangni, an•tangtangan sason ka•gipa ong•na, an•tangtangan sorkariko rikna, bil gnangatna aro an•tangtangan namroro silroroatna miksonganirangko chu•sokatna bimang ong•atani ong•a ineba ua janapatkuaha.
Khasi ku•sikko 8th Schedule-o napatchina janapengon, Khasi ku•sikko ra•gatchina Khasi Authors Society-an 1960 bilsimangonin ma•mong sorkario dabibaahachim. Indake Khasi Students Union-ba 1992 bilsionin, apsan mol•molaniko dakbaenga aro unbaksana a•dok sorkariba, 2018 bilsioni dipet ku•sikrangko ra•gatchina resolution-rangko tariaha.
Unigimin, lekka pora skie ra•anio, sea jotanio ku•siktangko jakkalna man•a gita aro tangkame rakkina man•a gita, Khasi ku•sikko 8th Schedule-o napatpachina ine KSU mol•molatenga ineba ua janapataha.
Minggipinara, Meghalaya a•doko Central Agricultural University-ko rikna ku•rachakgiminko chu•sokatchina ua Governor-o mol•molangaha.
Batanggimin 2010 bilsio, Ministry of Agriculture-ni ning•o ia Agricultural University-ko rike on•a gita ma•mong sorkari ra•chakangahachim aro ia University-ko Ri-Bhoi a•jani Kyrdemkulai-o donggipa 200 acre mangni a•ao rikna ma•mongoni tangka paisakoba chamatman•aha. Indake, Union List I-ni Entry 64-o janapani gitade ma•mong sorkari aro a•dok sorkarini gisepo, ia University-ko rikna songgigrikman•aha.
Uni gimin, a•doko songdongkamenggipa manderangni neng•nikanirangko ma•sichake uamangni nanggrikanirangko chu•sokatchina ine uamangni on•atgimin memorandum-o Thabah janapataha.
Na·simang ia video-koba nina man·gen:
Na·simang iakoba poraina man·gen: Them Metor-o songdongenggiparangko gipin biapona apjitaniko Punjab-ni Sikh-rang jegala
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
