Tura, Sept 30: Meghalaya a•doko lekka porani gadangko tang•doatanian ia sorkarini mongsonggipa daito ong•a ine Bristibar salo a•dokni Chief Minister Conrad K Sangma parakataha.
Lekka porako tang•doatna kam ka•anio dingtang dingtang ra•biani aro neng•nikanirangko chagrongna nangengoba a•dok sorkari, skul nokrangko aro skie on•ani dingtang dingtang cholrangko namdapatna jotton ka•enga ineba ua aganaha.
A•dokni pilak biaprangon lekka porako nambate on•na man•na gita sorkari dingtangmancha program-rangko ra•gate on•aha ineba Chief Minister parakataha.
Lekka porani a•bako bakande dingtangatna man•jawa ine janapatengon, iani giminsa sorkari dingtang dingtang cholrangko jako ra•e kamko ka•enga ine Sangma aganaha.
Bristibar salo a•dokni Chief Minister, South West Garo Hills a•jani Garagre songo donggipa St Anne’s School-ko nokdonggae on•angengon, a•doko lekka pora on•ani cholrangko dingtangatahani gimin gipin a•songrangoni re•bae kam ka•gipa missionary-rangko mittelpilangaha.
Bangladesh a•songni simarango donggipa skulrangna ua dingtangmancha solar light aro computer-rangko on•na gitaba ia tom•anio ku•rachakangaha.
St Anne’s School-ni gital nokko Chief Minister-ni nokdonggae on•angani somoio Tura-ni Bishop Rt Rev Andrew R Marak aro Auxiliary Bishop Jose CJ-ba dongpae bak ra•angaha.
Ia gital skul nokko nokdonggaani somoio skulni bi•sarang, gitrangko ring•e aro chrok mesae manderangko an•saoatangaha.
Ia skul nokko rikna gita dingtang dingtang dolrang an•tangtangni man•a gita on•giltokaha aro Germany a•songni chadamberangba, Krismas gitrangko ring•e tangka paisarangko gilchimongenba, ia skulna on•gilataha.
Meghalaya a•doko lekka porako on•na gita kamrangko ka•anio missionary-rangna dakchakanirangko on•engani gimin Bishop Jose, a•dokni Chief Minister Conrad Sangma-ko aro Meghalaya sorkariko mittelpilangskaaha.
Ia skul nokko nokdonggae on•ani somoio Tura-ni Bishop Rt Rev Andrew R Marak-ba jinmana aganprakengon, mandeko jawaianian an•chingni janggi tanganio gamchatbatsranggipa chimongani gita ong•a ine Purno A Sangma sagini agangipa kattarangko manderangna gisik ra•atpilaniko on•angaha.
Songsalni namroro silroroanina a•gilsakni seng•aniko nangchongmota ine janapatengon, Garo Hills-o missionary-rang, pilak kona noksikrangonaba ia seng•aniko ra•angkugen ine Rev Marak parakataha.
