Shillong, Sept 30: Re•baenggipa October-ni 30 tariko ong•atna sienggipa Mawphlang Assembly bye-election-o United Democratic Party (UDP)-ni tikitko on•genchimode, gitcham MLA SK Sunn-ni depante Eugeneson Lyngdoh susagen ine Bristibar salo jinmana parakataha.Mawphlang bye-election-o Eugeneson Lyngdoh-ko susachina nangniktokengani gimin Bristibar salo, Mawphlang constituency-ni bang•bea manderang, gitcham MLA SK Sunn-ni noko tom•chimongtokaha aro una an•tangtangni chakpaaniko mesokangtokaha.Mawphlang-ni gitcham MLA SK Sunn, COVID-19 man•enba re•anggipa September-ni 10 tariko siangahachim aro uni siangani ja•man Mawphlang constituency-ni bang•a manderangan uni depante Eugeneson-ko susaskachina nangniktokengachim.

2018 bilsini Assembly election-o SK Sunn, Independent candidate ong•e susaesa chegipa ong•ahaoba ja•mano ua UDP-ni associate membor ong•ahani gimin da•o bye-election-oba uni depante Eugeneson Lyngdoh, UDP-ni tikitchisa susana nangnikengachim.

Eugeneson Lyngdoh-ko Meghalaya a•dokosan ong•aigija India a•song gimikon robol kal•na changani gimin mingsing minggama aro ua a•doktangosan ong•aigija India a•songnaba robolko kal•ahachim.