By Nora Sangma

Meghalaya a∙doko mese a∙kol cho∙e, niamni a∙palo koelarangko bikotaniko an∙ching ru∙uta bilsirangonin nikbaenga aro iani a∙selan adita sak koela a∙kolo kam ka∙gipa manderang janggiko gimaatna nanganirangkoba nikenga. Apsan dakgipa obosta mija re∙anggipa robibar salo May jani 31 tarikoba Umpleng, East Jaintia Hillsni a∙jao niamni a∙palo koela cho∙enggipa a∙kolo sakbonga manderang a∙a bedapaniko man∙e sina nangao ga∙akaha. Indakgipa obosta ong∙anirangara gitalgipa ong∙ja maina an∙ching nikatna gita man∙a je batanggimin 2018 bilsioba apsan daken niam gri mese a∙kol cho∙e koelako bikotgipa biap Ksan, East Jaintia Hillsni a∙jao sak 13 kam ka∙enggipa manderang siahachim aro uamangni manggisikoba sakgni nikosan man∙pilaiahachim. Indakgipa obosta rango jaknanggipa nokdangnade baditan dukni ong∙paenggen! Ia ong∙enggipa obostarangara sani a∙sel ine an∙ching agangen aro sako dosi galgen?

An∙chingni a∙doko indake mese a∙kol bite koela bikotanirangko re∙anggipa 2014 bilsionin, jekon National Green Tribunal (NGT) champengatanikoba dakahachim maina a∙doko koela bikotanira scientific method ba chasongni gita nama bosturangko jakale bikota ong∙ja aro kam ka∙enggiparangna kenchakani gnang, unbaksana samtangtango dongenggipa buring bolgrim, chiring-chibisikrangna, matburingrangna aro sondongenggipa manderangnaba namgijaniko on∙a inenba champengataniko dakahachim. Indake ong∙genchimoba, re.anggipa ja-na skangsan an∙ching a∙dokni Chief Minister Pa Conrad Sangma,Union Ministry of Coal, Chasong gitalni gita koela bikotani bosturangko ba chol aro niamrango pangchake a∙doko koelako cho∙piltaina gita rachakangaha ine kobor ra∙timgiparangna parakatahachim. Chief Ministerni indake agan-parakatni antisani ja∙manon an∙ching apsandakgipa niam gri mese a∙kol bite bikotenggipa koela a∙damo robibar salni bako sakbonga manderang ja∙ga saaniko knasotaina man∙aha.

Ia ong∙gipa obostarangni bidingo dingtang dingtang a∙dokni dilgiparang sorkarini kosako aditan matnange aro jegale agananirangkoba dakatahachim. Apsan daken UDP dolni general Secretary Pa Jemino Mawtoh ba sorkarini kosako matnanganirangko dakahachim, indiba an∙ching pilakan ui∙a a∙dokni niam retiko nirokenggipara uamangni dolni Pa Lahkmen Rymbui-an ong∙achim. Batanggimin chango, chong∙motan a∙doko niam gri koelarangko bikotani aro salaniko champengna man∙jani bidingon uamang Pa James Sangmani Home portfolioko ra∙galatahachim. Indide Pa Rymbui ba apsandaken an∙tangni chokkiko wate on∙na nangao ga∙akjaengachima? Ma bio maming gualani dongja? Ma gipin Party kosan jaksi otna manaiama? Aro jean a∙dokko nambate re∙dilna ba dilna changgipa mandena biapko on∙skana nangjaengachima?

Niatgenchimode, UDP rangara pangnan gipin Party ni Minister-ni maiba ong∙gijaniko ba maiba a∙selo jangnangako nikjokon, hala ka∙ronge aro su∙dodoe chokkioniko ra∙galna chol dakbea ine an∙ching niknagita man∙a. Indiba an∙tangtangni Party ona obosta sokbajokode donunasa jotton ka∙a. Ia kam rangan uamangni mikbuani gisik rangko public na mesoka ga∙aka maina uamang jawakosa matnangna man∙aia aro an∙tangtangona sokode uamang uko donuna je cholchiba jotton ka∙a. Indakgipa dilgiparang jean mikbuani gisikchi kam ka∙giparang ming apsan a∙dokko dilna nangode, sorkari maming saloba bilakna man∙jawa. Sorkariko rikengon ku∙mong nangrime krimkro kam ka∙anichisa a∙dokna namroro-silroroaniko ra∙bana gita man∙a aro bil donga.