Shillong, May 7: Shillong songjinmao aro East Khasi Hills district-ni gipin biaprango chu·gimik lockdown-ko ong·atani gnigipa salo, mitam nangchongmotgipa bostrurangko palgipa dokanrangko kulina gita Deputy Commissioner-ni cholko on·ani gimin mitam manderangni bostu brena ong·katanirangko nikangna gita man·ahaoba, sorkakri ia lockdown ong·ataniko district-o ra·dodapangode ingipao songdongenggipa manderangni gisepo jajrengsoanirangba dongskaenga.
Lockdown-ko district-o ra·dodapna nangode ine jajrengsoenggipa mitam manderangko chagronge Hub News-ni Sukrobar salo sing·rokaniko dakangon, maibakai ia lockdown-ko ra·dapangode maidake janggi tanggen ine Shillong sonjinmao dongenggipa saksa M Sangma aganaha. Ramram manderangni janggi tanganikoba gisiko done ia sabisiko champengsona sorkari jedakgipa tik ka·anirangkoba dakna nanggen ineba Sangma agandapataha.
Sorkari, ia lockdown-ko maibakai ra·dodapatode uamang bang·a neng·nikanirangko chagroggen ine sakgipin Gershome Hat minggipa aganskaaha. “Iana skang, sorkari lockdown-ko gitik-gitaksa tik ka·angani a·sel chinga mamingon tarisamsona cholko man·rikjaha. Da·o iako ra·dodapangode, chingo cha·ani-ringani mangmangba dongjawajok,” ineba ua agandapaha.
Indake sakgipin Sangeeta Rana indine aganskaaha, sajinmani baririkrikaniko niate lockdown-ko ong·atani nangchongmotgipa ong·a, indiba iana skang dakanga gita odd aro even-o pangchake sorkari ianpakoba niamko ra·bana nangachim ine chanchiatangko parakangaha.
An·tangko ma·siatna nangnikgijagipa sakgipin Shillong-o donggipani aganani gita, COVID-19-ni mamla salsa-batbat batroroengani obostako niate lockdown-ko ra·dodapatanian nambatgipa ong·enga. Salantin sabisiko man·giparang sak 300 na batenganiko pangnan niksorongenga, uni gimin lockdown-ko ra·doanian nambatgipa chol ong·gen, ong·jaode obostarang bate namrorojawa ineba ua agandapataha.
Unbaksana, Police Bazar-o saksa dokan dakenggipa Anoop indine aganskaaha, ching gita dokan dake cha·enggipa manderangna maming kam dongjani a·sel namen neng·nikaniko chagrongna gita nangenga. “Nok para gamna nange, bijolina aro telephone-na kajinarangko gamna nangeming janggi tangna namen neng·ani ong·a, indiba sabisini bakroroani a·sel lockdown-koba nangtaiskaa. A·doko songdongenggipa kangal manderangna maiba dakchakani cholrangko sorkarini gita on·na nangachim,” ineba Anoop aganangkuaha.
