Shillong, Sept 13: Lokayukta-ko bilgriatna gita NPP-chi dilenggipa Meghalaya Democratic Alliance (MDA) sorkari jotton ka·enga ine Sombar salo, Opposition dolni dilgipa Mukul Sangma matnangataha.
Sangma-ni parakatani gitade, sorkarini dingtang dingtang kamrangko ka·anio tangka jakkalsretanirangko champengna gitasa Lokayukta-ko songahachim indiba batanggimin bilsi gittam atana MDA sorkariko chalaianio, Lokayukta-ni kamrangko bilgriatna gitasa jotton ka·skaahachim.
A·doko Chief Information Commissioner-ko songningjaengani giminba Opposition dolni dilgipa, MDA sorkariko matnangataha.
Sangma-ni aganani gitade, sorkarini kamrangko ma·sie ra·na gitasa Right To Information (RTI) Act-ko manderangna ra·gatahachim indiba Meghalaya a·doko Chief Information Commissioner-ko sorkari songe on·ningjaengani a·sel, RTI-ni kamrangko bilake ka·na man·jaengachim.
Police officer-rangko kam ra·rurarongengani a·selan Police-rangni kamo olgrokanirangko nikna man·enga ineba ua MDA sorkariko matnangataha.
