Shillong, Sept 13: Meghalaya a·doko songdongenggiparangoni mongsongbatgipa jatgittamni manderangko dingtang dingtang political dolni dilgiparang, nangrimatna man·jaenga ine Sombar salo a·dokni gitcham chief minister Mukul Sangma, mikchi ong·e aganaha.
“A·doko seokako man·gipa dilgiparang aro dingtang dingtang political dolni dilgiparang an·chingni mongsongbatgipa jatgittamni manderangko nangrimatna man·jaha ine angni politician ong·e kamko ka·anio anga nikna man·aha,” ine Mukul, kobor ra·timgiparangna aganaha.
Sangma-ni parakatani gitade, a·doko songdongenggipa Garo, Khasi aro Jaintia jatrangko nangrimatna man·jaengani a·selsa jatsa jatgipinni gisepo meli nangrimani aro jatsa jatgipinni kosako mikbu miknenggrikanirangko nikna man·enga.
A·doko songdongenggipa manderangni gisepo meli nangrimani dongchina gita ua pangnan Nokgipa Isolo bi·rongenga ineba a·dokni gitcham chief minister aganaha.
Dilgipako seokna on·gimin bilni gamchataniko ma·sie ra·china gita a·doko songdongenggipa manderangko didiangengon, mande saksani ong·gija ja·ku de·anichian a·dok gimikna nangchakeaniko ra·bana man·a ine Sangma aganaha.
“Uni gimin da·o 2023 bilsi sepangbaengahaon, joltangni ba constituency-tangni giminsan chanchiaigija a·dok gimikni namgninasa chanchie an·tangtangna on·gimin bilko jakkale dilgipako seokchina anga manderangko didienga,” ine Sangma aganaha.
