Shillong, March 8: Meghalaya a·doko skanggipa “Human Milk Bank” -ko a·dokni Governor Pa Satya Pal Malik, Sombar salo Shillong-ni Dr. H. Gordon Robert’s Hospital-o a·bachengate on·angaha.
Rotary Club-ni dakchakanichi mandeni sok bitchiko man·gipa biapko a·bachengate on·aniara, hospitalrango donge saenganichi, bi·sako atchiate sianganichi ba sok ong·gijanichi atchidaldal bi·satangtangna sokko on·na man·jae dongenggipa bi·sa bakgitchakrangna sok bitchirangko man·adipet on·angna gita miksongani ong·a.
Tom·ao aganprakanio, atchidaldal bi·sarangna ma·gipani sok bitchiko on·anian nambatgipa ong·a maina ma·gipani sok bitchisa mangmang bi·sa bakgitchakni be·en-bimangna dingtangmancha meli-ma·gapa ine Governor Pa Malik parakataha.
“Sakanti ma·gipakon bi·satangtangna sok kanchina didianiko on·na nangchongmota. Jensomoio mainiba a·sel bi·satangna sok bitchiko kanna man·jaode, bitchiko jete bi·sana kanna nanga, indiba ma·gipani sok bitchi ong·jaode ba chu·ongjaode ra·chimonge chekgimin sok bitchi ba Pasteurized Donor Human Milk (PDHM)ko on·anian nambatgipade ong·gen ineba Governor agankuaha.
Jrima komie atchigiparang aro very low birth weight (VLBW)o ga·akgipa bi·sa jelaoni sagiparang aro sigiparang India a·songo donganichi bang·a ra·bianirangko chagrongna gita nangengani gimin aganengon, “An·chingni a·songo, jrima komie atchigipa bi·sarangni bal-bojako chilna nanganian dingtang dingtang hospital-rango 20% mangni gita ong·engachi sigiparang aro sagiparangba apsandaken ong·enga. Uandakgipa bi·sarangna ma·gipani sok bitchiko kananichi atchidaldal bi·sarango saa napanirangko bang·en komiatna dakchakgen,” ine ua janapataha.
Da·odipet, salgro-salaram a·jolrangoni Guwahati, Shillong, Silchar, Tinsukia, Siliguri aro Malda, ia biaprangosan ma·giparangni sok bitchiko man·gipa biap ba Mother’s Milk Bank-rangko a·bachengate on·engkua. Shillong-ni Dr. H. Gordon Robert’s Hospital-o indaka cholko ra·baanio, hospital-o dongenggipa bi·sana sok kangipa ma·giparangni sok bitchirangko ra·chimonge jadokrangna kingking ua biapo donna man·gen. Skanggipade, ua sok bitchiko hospital-ni neonatal intensive care unit-o donako man·gipa atchigital bi·sarangna on·anggen.
Atchigital bi·sarangna simsakaniko on·na gita salgro-salaramo ja·kuko de·chakatanio, Satribari Christian Hospital-o mija bilsi December jani 10 tariko a·bachengate on·anganichi chekgimin sok bitchirangko name donchakani biap ba human milk bank-ko Assam a·doko skanggipa chang man·chengaha, jean salgro-salaramode iandakgipako man·chengenga aro a·song gimiko 15-gipa ong·enga.
“A·song gimiko neonatal intensive care unit (NICU)rang inditan bang·rorobaoba somoina skang atchigipa ba jrima komie atchigipa bi·sa bakgitchakrangna nanga gita cha·anirangko on·na ma·gipani sok bitchirangko chu·onga gitan nangenganirangko a·song gimikoniko nikna man·enga,” ine a·dokni Governor agandapaha.
Iani gisepon, bang·a NICU-rango ma·gipa ong·daldalgiparangko salo changgni ba changgittam dake sok bitchirangko sepeming NICU-na on·china aganahaoba, uko namedake cheke donani aro sok bitchirangko man·gipa biapkode Guwahati songjinmao mangmangba tarikujaengachim.
“Bi·sana ma·gipani sok bitchian nambatgipa ong·a ine an·ching ma·sia. Ian ma·malni kri nambatasan ong·aija indiba bi·sana namen nangchongmotgipaba ong·a. Indake ong·engon, bang·a dingtang dingtang a·selrangchi atchidaldal bi·sarangna sok bitchirangko chu·onge kanna altuagipa kam ong·rongja aro iandakgipa neng·nikanirang jensomoio bi·sako NICU-o donatako man·osa bate namjabata”, ine bi·sarangko sanenggipa IPDG Dr. Debashish Das agandapataha.
