New Delhi, July 6: Ia antini gisepon ma·mong sorkarini Cabinet-ko gital dake sualpiltaina siengon, Mongolbar salo sorkari, a·dok damchetni governor-rangko dingtangataha. Governor-rangko sualpiltaianio Union Minister Thaawarchand Gehlot-ba Karnataka-ni Governor-na songako man·aha.
Karnataka-ni gital Governor-na songako man·gipa Gehlot, Social Justice & Empowerment-ni Union Minister ong·engachim aro ua 2019 bilsionin Rajya Sabha-oba saksa dilgipa ong·engachim.
Gehlot baksana gipin sakgittam gital governor-rangkoba a·songni President Ram Nath Kovind songe on·angaha aro uamangara Vishakapatnam-ni gitcham Lok Sabha MP Hari Babu Kambhampati, Gujarat-oni BJP dolko dilgipa Mangubhai Chhaganbhai Patel aro Goa Legislative Assembly-ni gitcham Speaker Rajendra Vishwanath Arlekar ong·a.
Hari Babu Kambhampati-ko Mizoram-ni Governor, Mangubhai Chhaganbhai Patel-ko Madhya Pradesh-ni Governor aro Rajendra Vishwanath Arlekar-ko Himachal Pradesh a·dokni gital Governor songskaaha.
Ia a·dokrangni gitcham governor-rangko gipin a·dokrangona ra·jitangskaaha aro uandaken Mizoram-ni gitcham Governor PS Sreedharan Pillai-ko Goa-ona, Haryana-ni Governor Satyadev Narayan Arya-ko Tripura-ona, Tripura-ni Governor Ramesh Bais-ko da·o Jharkhand-ona, Himachal Pradesh-ni Governor Bandaru Dattatraya-ko Haryana a·dokona ra·jitangskaaha.
Kobor on·timgiparangni u·iatani gitade, ma·mongni cabinet-ko ia antini gisepon gital dake sualpiltaigen.
