Tura, July 2: Bilsianti ong·atenggipa Inter Mahari Football Tournament ba Maharirangni robol kal·susaanio ia chang, dol 39 me·asarang aro dol 19 me·chikrangba bakko ra·anggen.
Ia robol kal·susaaniko ong·atani bidingo West Garo Hills a·jani District Sports Officer Saljagring M Marak, Hub News-na talate on·angengon, me·asarangni kal·susaaniko July-ni 8 tariko aro me·chikrangni kal·susaaniko July 10 tariko, Tura-ni Chandmary kal·chakramo a·bachengatgen ine parakataha.
Ia robol kal·susaani final ba bon·kamgipa kal·aniko re·baenggipa August jani 19 tariko Tura-ni PA Sangma Stadium-o ong·atna ka·dongsoenga ine janapatengon, final-o chegipa aro ama man·gipa dolrangna wak mangsa baksana, merong kg 50, cha chini, me·su samjak aro gipin nanga bosturangko on·anggen aro best goalkeeper, player of the tournament aro highest scorer-ni award-ko man·giparangna do·o kasi mangprak baksana trophy-rangko on·angskagen ine Marak parakataha.
Ia Inter Mahari Football Tournament-ko a·bachengatani bidingo talate on·angskaengon, ia kal·susaaniko 2021 bilsio Matchakolgre kal·chakramo a·bachengataha, jeon dol 16 robol kal·giparang bakko ra·angaha ine DSO parakataha.
Ia chang me·chikrangnaba robol kal·susaaniko a·bachengatani gimin janapatskaengon, me·chikrangonide bang·e dolrang bakko ra·jawa ine uamang chanchisoengachim indiba dol 19 me·chikrang bakko ra·na gita register ka·ahani gimin uamang namen kusi ong·a ine Marak parakataha.
