Gitcham CM Salseng C Marak-ko bon•kame watgrikaniko daka
Resubelpara, Aug 17:” Mama, anga nangko pangnaba gualjawa”, ian bon•kame Deborah C Marak-ni, uni mamatang a•dokni gitcham Skotong Minister Salseng C Marak-ko gopna skang watgrikanio agangipa kattarang ong•a.
A•dokni gitcham Skotong Minister Salseng C Marak-ko, mande ra•bean baksa bon•kame Sonibar salo gopaha. Uko gopna skang watgrikaniko dakani somoio, bang•a politician-rang aro gipin mande ra•ako man•a kragipa manderang aro songdong a•chaenggipa manderang, uamangni ka•sabegipa dilgipa aro mongsongbate namgipa mandeko watgrikaniko dakna North Garo Hills a•jani Resubelpara Mini Stadium-ona tom•batokaha.
Skotong Minister Conrad K Sangma, Speaker Thomas A Sangma, Deputy Speaker Timothy D Shira aro a•dokni gipin official-rang, ia Garo Hills a•jani mande ra•ako man•gipa political leader-ko, silai goachi salam ka•e bon•kame mande ra•aniko dakangaha.
Congress dolna bakrobate dangdike on•gipa aro gitcham Deputy Chief Minister ong•anggipa Deborah C. Marak, Shillong-o mamatang baksa donge uni dal•rorobaaniko aro uni mamatang baksa sal somoi re•atanirangko, mikchirang baksa gisik ra•atpilaniko dalangaha.
Uni mamatangan uko jakkindile re•dilgipa ong•achim, ua mamatangko ja•rike politics-ni a•bao Congress party-o napaha aro Williamnagar constituency-o chegipaba ong•ahachim.
Uni mamatang, pangnaba darang baksaba nanggrikanirang dongjachim, indiba gipinrangna uni u•i ma•siatangko manderangna skie on•skagipa ong•achim ine ua aganaha.
Unbaksana, ia funeral ceremony-ko chu•sokatanio aro uamangni duk kalimani somoio nokdangni manderang baksa ong•ahanina sorkari koba ua mitelpilskaaniko dakangaha.
Skotong Minister Conrad K Sangma-ba, Salseng C Marak sagini dilanio gisik seng•aniko aro niksenggipa ong•aniko aro Meghalaya a•dokko mangrakbatatna on•gilaniko gisik ra•atpilaniko dakangaha.
A•dokni manderangna ka•sagipa aro gisik matsramgipa dilgipako gimaataniara a•dokna dal•bea gimaani ong•aha, skulo skigipani kamko ka•chengaoni headmaster-ni kamko ka•aona aro bon•kame a•dok sorkari ko dilgipa ong•aona, uni janggi tangani sakgipinrangna namen didiani ong•chongmota ine Sangma aganaha.
Uni mongsonggipa gunrangni gimin janapengon, katta agananio ka•singipa, mandeskako mande ra•na changgipa, sontolgipa aro gisik matsramgipa ong•a aro mongsongbate uni janggi tanganio silroro namroroatanio gamchatgipa skianirangko, Marak sagi on•aha ineba ua agandapaha.
A•dokni Speaker Thomas A Sangma-ba, uni a•gilsakko watangani dongrikenggipa manderangna dal•a gimaani ong•aha ine aganaha. Ua a•dokni silroro namroroaniko skang done bang•a neng•nikanirangko ka•sroken mikkangchakangaha, ua saksa jakkindile re•dilgipa, saksa meligipa ripeng aro bang•a manderangni ka•dongani ong•a. Ua a•dok sorkari ko kim•kim ong•e rakkiaha aro bang•a political dilgiparangko apsan nangrime kam ka•dilaha, uko chonaonin ma•sie uko ja•rikbaaha aro uni dilaniko pangnan de•dorongaha ine aganaha.
2008 bilsio Rajya Sabha Seat-na susaanio, Marak sagini kosako ua chegipa ong•ahachim, ua somoioba ka•o nangani pal batesa una dakchake aro skiesa on•aha ineba ua janapataha.
2008 aro 2018 bilsio Marak sagini kosako chegipa ong•gipa aro da•alo Resubelpara-ni MLA ong•enggipa Deputy Speaker Timothy D Shira-ba, Salseng C Marak sagi namen sontolgipa, gisik namgipa aro katta agananio ka•singipa aro an•tang manderangna ka•sagipa ong•achim.
Ua 1972 bilsioni 2008 bilsiona Resubelpara-ni MLA-na seokako man•aha. 2013 bilsio ua chetaiaha aro 2018 bilsio amako man•skaaha, indake 2023 bilsio bilsi re•anganichi dingtang dingtang neng•nikarangko man•ahani gimin ua susaajaha, ua namen seng•gipa aro gisik matsramgipa mande ong•achim ine aganaha.
Gitcham Skotong Minister Dr. Mukul Sangma-ba, uni kalimpaaniko parakataha aro a•dokna uni on•gilpaani itihas-o gisik ra•gnigipa ong•a ine janapataha. Uni dal•batsranggipa chu•sokaniara, A•chik Liberation Matgrik Army bobil dol baksa namroro silroroanina aro tom•tomanina songgigrikna man•anian ong•a ineba janapdapataha.
Ia salo gipin dilgiparangba Marak sagiko mande ra•pilskaaniko dakangaha. Indake Congress President Mallikarjun Kharge-ni kalimpaani kattarangko Congress dolni dilgipa Vincent Pala poraiataha aro Congress dolko dilenggipa Rahul Gandhi-ba uni kalimpaaniko parakataha.
A•dok Governor, CH Vinayashankar-ni mande ra•pilskaani gita Aide-De-Camp-o pulrangko donangaha aro uni kalimpaani kattarang-ko North Garo Hills a•jani Deputy Commissioner poraiatskaaha.
Indake, gitcham CM DD Lapangni palo, Education Minister Rakkam Sangma, mande ra•pilskaani gita pulrangko donangskaaha.
SC Marak sagiko gopna skang watgrikanio gipin Cabinet Minister-rangoni bak ra•anggiparangara, AT Mondal, Marquise Marak, MLA-rang, gitcham MLA-rang, MDC-rang aro una ka•sagipa bang•a manderang ong•achim.
Na·simang ia video-koba nina man·gen:
Na·simang iakoba poraina man·gen: NPP dolona napna miksongenggipa MLA-rangko Cong suspend ka•a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
For news & updates, Download Hub News App from Google playstore
