Resubelpara, April 24: North Garo Hills a·jani Raja A·pal Todam songo aiao inmanpilgipa misilbegipa a·sel ong·taiaha.

Koborko man·soani gitade, me·apa saksa bilsi 17 ong·gipa demechiko den·e siataha. Dos dakgipa me·apa Lillam Marak, Sukrobar attamchibara jikgipani noko dongjamiting somoio demechikko drae til·ekna jotton ka·ahachim, indiba demechik raken jechakani gimin uko attechi den·e so·otaha.

Aganani gitade, so·otako man·gipa me·chikara Lillam Marak-ni demechik chong·mot ong·jachim, indiba ma·gipani gnigipa ra·taigipa segipa ba wanggipa ong·achim. Wanggipa, demechikko kragija drae til·ekna man·jani giminsa an·tangni desaronko so·otahachim.

Apsandakgipa a·sel re·anggipa February jao mangmangsan apsan songsul Dingok-o Raja A·pal songni bilsi 13 ong·gipa me·a bi·sako doke siatahachim, uni gisepon apsan changsatai misilbegipa a·sel ong·taiaha ine nikatna gita man·a.

Ia a·selni bidingo sianggipa me·chikni maharirang Bajengdoba police station-o badi ka·e, manggisiko rate porikka ka·na gita hospital-ona ra·angaha. Me·chikni maharirang badi ka·ahani gimin police-rang sandianiko a·bachengataha. Indiba dosi dakgipa me·apa demechikko so·otani bakan kate chakaha ine NGH-ni Superintendent of Police Pa AT Sangma u·iataha.

Indake ong·genchimoba, demechikko so·otani ja·mano ua me·apa an·tangko kae siaha. Uni manggisiko Sonibar pringo nikaha aro uko rate porikka ka·na ra·angaha ineba koborna u·iataha.