Imphal, Feb 18: Manipur a•dokni Assembly election-na kamrangko ka•chichatokengahaon, Sukrobar salo National People’s Party (NPP)-ni national president aro Meghalaya a•dokni Chief Minister Conrad K Sangma-ba gnigipa changna NPP-ni candidate-rangna campaign-ko ka•na gita Manipur a•dokona re•angaha aro uni campaign ka•anio ua jinmana aganprakengon, apsan dolgni nangrime kamko ka•anio BJP dol, ku•rachakatangko rakkijaha ine matnangataha.
2017 bilsini Manipur Assembly election-ni ja•man NPP aro BJP apsan nangrime sorkariko rikahaoba ia chang election-ode BJP baksa bakrimgija NPP doltangari susaskaengachim ine nikna man•a.
“Batanggimin bilsi bongana apsan nangrime sorkariko chalaianio chinga bang•a neng•nikanirangko chagrongna nangaha aro uni a•selan chingni manderangna ku•rachakanirangko chinga bang•en chu•sokatna man•jaha,” ine Imphal songjinmani Kesamthong constituency-o NPP-ni MLA L Jayantakumar-na campaign ka•engmiting somoio Sangma aganaha.
2017 bilsini Manipur Assembly election-o NPP dol, damsku constituency-rango susae damchetko chena man•ahachim.
NPP national president-ni parakatani gitade, BJP baksa sorkariko chalaianio neng•nikanirangko chagrongna nangahani gimin NPP-ni MLA-rang, BJP baksa bakrimaoni ong•kate kattokahachim indiba ua mol•molahani giminsa NPP-ni MLA-rang BJP-chi dilenggipa sorkariona re•angpilahachim.
Ia chang Manipur Assembly election-o gimik dam 60 seat-rangoni NPP dol, dam 39 seat-rango susaenga ine nikna man•a.
