Shillong, Feb 7: Ia changode Manipur Assembly election-o National People’s Party (NPP) bilakbate aro nambata candidate-rang baksa susaengani gimin batanggimin changona bate ia chango NPP dolna cheani cholrang nambatenga ine Sombar salo, NPP-ni national president aro Meghalaya a•dokni Chief Minister Conrad K Sangma parakataha.
Sangma-ni parakatani gitade, ia chang Manipur Assembly election-o sak 42 candidate-na baten NPP-ni tikito susaenga.
Manipur Assembly election-ko February aro March jao bakgni dake ong•atengachim ine nikna man•a.
“Chinga chingni candidate-rangko jinmana parakatmanaha aro ia changode chinga bang•bata seat-rangko chena ka•dongenga. Batanggimin chang election-ona batede ia chango chinga nambate dakna ka•dongenga,” ine NPP-ni national president parakataha.
Manipur Assembly election-o BJP aro NPP dolgnian dingtang dingtang susaengani gimin sing•on, NPP dolba jakgitelgipa dol ong•e doltangari susana man•a aro iano darangba darangkoba champenga gita ong•jaenga ine Meghalaya CM aganaha.
“Chinga BJP-ni cholrangko champengna susaenga ong•ja aro uamangba chingni cholrangko champengnade susaenga ong•ja. Chinga a•bachengonin jakgitelgipa dol ong•e doltangariba susana bil donga aro pangnan iandaken susaanggen. Badiaba constituency-rango chinga Congress baksa, badiaba constituency-rango BJP baksa aro badiaba constituency-rangode chinga NPF ba gipin dolrang baksaba susaenga,” ine Sangma aganaha.
