Delhi, June 7: A·songni skotongo songdongenggipa Kuki-Zomi-Hmar-Mizo-rang gimik man·chape, Manipur a·dokni a·bri-a·kong jolrango songdonggipa tribal manderang, New Delhi-o ma·mongni Home minister Pa Amit Shah-ni dongenggipa biapchina mikkangangenba Butbar salo jinma re·jome jingjengataniko dakangaha.

Manipur -ni a·kawe jolrango jelbatgipa Meitei jatrang aro a·bri jolo songdong-a·chagipa Kuki jatrangni gisepo dal·en kajia-golmalrang batanggimin somoio ong·angani a·sel, a·doko songdongenggipa tribal manderangna chel·chakaniko on·china aro a·doko tom·tomaniko ra·bapilchina gita ma·mong sorkario mol·mole, Manipur-ni tribal jatrang salni bako re·jomaniko ong·atanggipao bang·en bakko ra·angtokaha.

Jingjengatgiparang, ma·mongni minister-na chittiko on·anggipao, Kuki aro Meitei jatrangni songdonggipa jatchigriko champenggrikaniko on·na gita a·bri ja·reko military outpost-rangko donchina, armed force-rang jekai Commando, IRB, MR ba ugita gipin sipai dolrangko a·dokni ning·aon donge nirokatchina ba uamangni a·tip ba battalion tangtangon dongatchina, Arambai Tenggol aro Meitei Leepun bobil dolrangko rim·na gita uamangni kosako ja·kol sananirangko dakatchina, Meitei officer-rang, Indian Army jawanrang aro CAPF iarang gimikkon Manipur-ni a·palchina kam jitatchina gita dabianirangko dakangaha.

Uamangni dabianirangko gong·raken chu·sokatjagenchimode, Manipur-ko an·tangtangarichi sason ka·na gita miksonge re·chakatenggipa aro India a·songni kosako chakatgipa Meitei bobil dolrangni Manipur-o Kuki -rangni songdongenggipa biap ba songrang gimikko man·chape bang·a manderangni janggirangko nisidape galna kenchakanirang dongengani bidingoba jingjengatgiparang ma·mong sorkariko mikrakatangjolaha.

Iakoba poraie nina man·gen: WKH-o bi·sa sak 15-ko kragija dake kal·akanina SCPCR jegala