Imphal, March 9: Manipur a•doko bobil dake chakatenggipa manderangoni komibeoba sak 20 manderang, an•tangtangni silchidarerang baksa Mongolbar salni bako Manipur a•dokni Chief Minister N Biren Singh-ni mikkango bame on•eaha.
Koborko on•ani gitade, Mongolbar salo bame on•egipa manderangoni sak 16-de Thadou Peoples Liberation Army bobil dolni, sak 2-de United National Liberation Front (UNLF) dolni, saksade People’s Liberation Army-ni aro saksade People’s Revolutionary Party of Kangleipak-Progressive (PREPAK-Pro) bobil doloni ong•a.
An•tangtangko bame on•egipa bobil dolni manderang, AK-56 Rifle, M15 rifle aro Uzi SMG silchidarerangko man•chape ge 15 silchidarerang aro rong 75 gulirangkoba sorkarina pakwate on•eaha.
Home Affairs Union Ministry-ni project, Revised Scheme for Surrender-cum-Rehabiliation of Militants in the North East States 2018-o pangchake, bame on•egipa bobil dolni manderang, sakprako gong lak 4 ka•e tangkarangko man•e aro ia tangkarangko bilsi gittamna uamangni rehabilitation centre-o dongengmiting somoio uamangni bank account-rango donatgen ine sorkarioni u•iataha. Ia bilsi gittamni gisepo uamangna japrako gong 6000/- ka•e stipend-koba on•gen ineba u•iataha.
