Shillong, June 6: June jani a·bachenggipa antio Ma·mong sorkari, Meghalaya sorkari aro Hynñiewtrep National Liberation Council (HNLC) bodil dolni gisepgriko tom·tomanina agangrikna gita manchisoenggipani bidingo a·dokni skotong minister, Manipur-o ong·enggipa obostarangni a·sel agan-golporimna chol dongjaenganiko Mongolbar salo parakangaha.

“Manipur-o ong·enggipa obostani gimin Ministry of Home Affairs, gipin department-rang baksa kamo namen jakchakkujaengani gimin manchigimin gita dolgittamni gisepo agangrikaniko on·tisa neng·nikaniona sokataha ine skotong minister Mongolbar salo a·dokni cabinet tom·ani ja·man kobor ra·timgiparangna aganangaha.

Indake ong·oba, tom·tomanina agangrikaniko ru·utgijan a·bachengpiltaigen aro Ministry of Home Affairs-ba ia mamlani bidingode namen gisiko nangenga aro Ministry baksaba Meghalaya sorkari agangrikjringenga ine Pa Sangma aganangkuaha.

Iani gisepon, HNLC bobil dolni gitaba batanggimin somoirango organization-ni pilak ong·gijagipa kamrangko a·dok sorkari aro ma·mong sorkari kemako watjagenchimode sorkari baksa agangrikna nangnikjaenganiko parakangskaahachim ine nikna gita man·enga.