Imphal, June 11: Manipur a·doko ong·gija dakgipa manderangni ra·e katgipa police-rangni silchidarerangko on·pilchina gita mol·mole, Imphal East constituency-ni BJP MLA K Susindro Meitei, an·tangni nok a·palo dingtangmancha bakosko donataha.
Police-rangni silchidarerangko ra·bae donangpilchina gita mol·molatengon, “Ka·sapae na·simangni ra·e katgipa silchidarerangko ia bakoso donangpabo” ine BJP MLA, English aro Meitei ku·sikrangchi see donataha.
Silchidare ra·e katgipa manderangni kosako uamang mamingkoba dakjawa ine mesokna gita BJP MLA, ia ja·kuko de·aha aro uni iandakgipa kamrangko Manipur a·dokni bang·a manderangan mittelpilataha.
Re·anggipa jao, Manipur a·doko so·sojengjeng ong·na a·bachenga intalan dingtang dingtang biaprango donatako man·gipa sipai dolrangni silchidarerangko aro gulirangko, ong·gija dakgipa manderang ra·e katahachim ine nikna man·a.
Koborko on·ani gitade, komibeoba pong 4000-na baten police-rangni silchidarerangko aro lak 5-mangni gita gulirangko ra·e katahachim.
