Imphal, June 1: Manipur a·doko so·sojengjeng ong·ani ja·pangko am·sandina gita ma·mong sorkari, committee-ko songaha aro ia committee-ko High Court-ni neng·takgimin judge dilanggen ine Union Home Minister Amit Shah parakataha.

Mitam case-rangkode CBI-chi am·sandianggen ine talataniko on·angengon, darangnaba mikkang niteani grisa am·sandiani kamrangko ka·anggen aro dos donggipa manderangkode sasti on·gen ine Shah, Manipur a·dokni manderangna ku·rachakaniko on·ataha.

So·sojengjeng ong·anio an·tangtangni ka·sagiminrangko gimaatna nanggipa nokdangrangna kalimpaaniko parakatengon, tol·e jangbingbanganirangko bebera·jachina aro tom·tomaniko rakkiangchina gita Union Home Minister, Manipur a·dokni manderangko didiataha.

Batanggimin salgittamna Home Minister-ni Manipur a·dokona re·anganio, ua so·sojengjeng ong·batgipa Imphal, Moreh aro Churachandpur a·jarangonaba re·ange, tom·tomaniko ra·bapilna gita official-rang baksa agangrikangahachim.

Ia biaprango ua Meitei aro Kuki dolgnini dilgiparangkoba gronge agangrikaha.