Imphal, May 8: Manipur a•doko so•sojengjeng ong•anganichi tom•tomaniko ra•bapilna gita curfew-ko ra•gatangani ja•man Sombar salode, baditaba kontarangna curfew-ko dontongatahaon, Manipur a•dokni skotong Imphal songjinmao bang•a manderangan, an•tangtangna nanga bosturangko koros ka•na gita noktangtangoni ong•kate bazaar antirangona re•batokaha.
Manipur a•doko da•o ka•sinsin tom•tomaniko man•na a•bachengpilengahaoba, so•sojengjeng ong•gipa biaprangko name nirikkina gita drone aro helicopter-rangko jakkalengkua.
Batanggimin salrango so•sojengjeng ong•anggipa biaprango Army aro Assam Rifles-ni sipairangba ja•arangchi re•rurae nirok sandianirangko dakengkua.
Indake ong•engon, Manipur a•doko so•sojengjeng ong•aniko namatna gita pilak nanga dakchakanirangko on•ahani gimin Manipur a•dokni Chief Minister N Biren Singh, Union Home Minister Amit Shah-ko mittelpilataha.
Manipur a•doko Meitei jatnaba Scheduled Tribe (ST) status-ko on•china dabianiko jegale re•anggipa May-ni 3 tariko, dingtang dingtang Tribal jatrang, dam 10 a•jarango re•jomaniko ong•atengmiting somoio rang•gitik so•sojengjeng ong•ani ong•katahachim aro ia a•sel ong•anio komibeoba sak 54 manderang so•otako man•ahachim.
Ia biaprango so•sojengjeng ong•na a•bachengani ja•man Budbar sal dipet curfew-ko ra•gatangahachim indiba Sombar salode manderang, an•tangtangna nanga bosturangko koros ka•na man•na gita Imphal West district-o pring 5:00 bajioni pring 8:00 bajiona curfew-ko neng•takatskaahachim.
