Imphal, June 7: Manipur a•doko dingtang dingtang jatrangni gisepo so•sojengjeng ong•ani aro dakgrik dinggrikaniko namatna gita ta•raken ja•kurangko de•china mol•mole Budbar salo, Manipur a•dokni Tribal hijrarang, Maruploi Foundation-ni bimingo Manipur a•dokni Governor-na sedoataha.

So•sojengjeng ong•anirangko namatchina didiatengon, so•sojengjeng ong•anichi nokgri-jamgri ong•na nangenggipa manderangna simsak nirokarangko on•china aro duko ga•akenggipa manderangna pilak nanga dakchakanirangko on•china gita Maruploi Foundation mol•molataha.

So•sojengjeng ong•anirangko nirok sandina watatenggipa sipai dolrangkoba, darangnaba mikkang niteani gri aro darang jatni gisepo ding•chaogrikanirang dongjana gita name kamrangko ka•china Maruploi Foundation didiataha.