Imphal, May 7: Manipur a·doko kajia-golmal aro so·so-jengjeng ong·anganichi da·odipet sak 54 ramram manderangni janggirang gimana gita nangaha aro mata-bu·a man·e saknagipa bang·a manderangkoba da·o hospitalrango done sana-bananirangko on·enga.
Golmalrang ong·anggipa biaprango Indian Army sipairangko bing·tipen donataha aro so·so-jengjeng ong·aniko tom·tomatna gita golmal ong·gipa biaprango Army-rang flag march-rangkoba dakangaha ine koboroniko knasona gita man·enga.
Indake ong·engon, Imphal valley-o mija Sonibar salode manderangni janggi tangbewalona aditan sokbapilaniko nikna man·angaha, jeon adita de dokanrang kullipiltoka baksana bang·a-bang·gija garirangba ramarango re·ruratokaha.
Ia obostao sianggiparangni gimin official-rangoniko koborko man·soani gitade, sigipa sak 54 oni sak 16 ni manggisiko Churachandpur district hospital-ni manggisirangko donram biapo donenga, sak 15 ni manggisiko Imphal East District-ni Jawaharlal Nehru Institute of Medical Sciences-o donenga aro sak 18 manderangni manggisiko Imphal-ni Regional Institute of Medical Sciences (RIMS)o dongenga.
Mija Sonibar pringo, Imphal jillao bang·bata dokanrang aro bajar cha·gipa biaprang aro gipin biaprang kullipiltokaha, jeon chelchakgipa sipai dolrangni jipjange nirokangani gisepo bang·a manderangan me·su-samjak aro ma·manti nanga bosturangko brena ong·kattokaha.
Koborko on·ani gitade, Churachandpur district-ni biap damgnio gogrikanganichi bobil doloni sakbonga aro India Reserve Battalion-ni sakgni jawanrangba siangaha ine knasona gita man·aha.
Gomal ong·gipa biaprangoniko gimik-gimang sak 13,000 manderangko naljokataha aro uamangoni mitamrangko gipin naljoka biaprango donenga aro bangkirangko Churachandpur, Moreh, Kakching, aro Kangpokpi district-o army-rangni rikgipa a·tiprango donskaenga, ine chelchakgipa dolni ku·wattimgipa koborko parakataha.
Manipur a·doko so·so-jengjeng ong·enggipani bidingo mija Sukrobar salo, ma·mongni Home Minister Pa Amit Shah-ba video conference gita nipiltaiani tom·aniko ong·atangaha aro ma·mong aro a·dok sorkarini chu·batgiparang baksa agangrikanirangkoba dakjringenga.
So·so-jengjeng ong·gipa biapchiniko koborko man·dapani gitade, nanga bosturangko brena, me·su-samjak aro ma·manti bosturangko brena manderangna cholrangko on·na gita, a·dokni skotong minister Pa N Biren Singh, mongsong golmal ong·gipa Churachandpur district-o curfew ra·gatanikoba Robibar pringo konta-gittamna, chong·motan pring 7 bajioni 10 bajiona dikdiksa ra·galataha.
