Shillong, May 7: Cabinet minister gitcham aro bang·gija salrangni gisepo ong·nasienggipa Sohiong eleksino National People’s Party (NPP)-ni candidate ong·e susanakenggipa Pa Samlin Malngiang, mija Sonibar salo Mawlaiteng songo eleksinna tom·ani somoio United Democratic Party (UDP) oni sak 8 mangni gita seokgimin MLA-rang ru·utgijan NPP baksa bakrimnasienga ine mande jinmao a·kangangaha.
Indake ong·engon, UDP-ni saksa dilgipa Pa Allantry F Dkhar, Pa Malngiang-ni kattako maming pangchakani gri aro kakket ong·ja ine raken jegalatskaaha.
Sohiong-ni NPP candididate-ni a·kange agananganiara, People Democratic Party (PDF) oni sakgni MLA-rangni officialni gita NPP baksa bakrimani apsan salon ong·achim aro Sohiong constituency-ni bang·bata UDP-ni dilgiparang, Sohiong-o pu·onataniko ong·atna skang NPP baksa bakrimna nangnike ra·batokaha ineba ua aganangkuaha.
A·dokni cabinet minister gitcham, uni bilsi-5 rangna a·jani MLA ong·e dangdike on·angani somoio gong kror 130 -ni dingtang dingtang namroro-silroroatani project-rangko constituency-na ra·bae on·aha ine Sohiong-ni manderangna gisik ra·atangenba, Lawmei oni Umglyngka -ona gong kror 22-ni ramarangko tarie on·an baksa ua song damgniko nangdimate gong kror 77-ni dollongrangkoba uan kae on·aha ineba parakangaha.
Unomiting, apsan salo PDF aro NPP bakrimani programko ong·atani ja·man a·dokni dakchakgipa skotong minister aro NPP-ni National vice president-ba ong·enggipa Pa Prestone Tyngsong, NPP baksa bakrime kam ka·na gita a·dokni gipin political dolrangkoba apsandaken ku·mongenga aro ian chingni dai ong·a ine u·iatangaha.
Chinga darang dolkon watchanggija ku·monganiko dakenga, uandaken BJP dolkoba chinga ku·mongenga, indiba ian ong·na amoba ba amjaoba, chinga chingni dakna nangako dakenga ine NPP-ni dilgipa, BJP baksa bakrimani giminba agangrikanirang dongama ine sing·anina aganchakangaha.
UDP dolba, da·o NPP-chi rikdilenggipa MDA-II sorkarini bak-rengsian ong·enga, indiba mikkangchini giminsa aganna man·ja ine Pa Tynsong, sing·anina aganchakangengon, mikkangchinikode somoi sokjokosa u·igen, anga da·o iani gimin aganna nangnikja, indiba politicalo dingtanganide salantiba, anti-antiba ong·na man·aia, uni gimin iani bidingo anga mamingkoba aganna nangnikjaenga ine a·dokni dakchakgipa skotong minister, Sohiong eleksin ja·manoba UDP dol, sorkario bak ong·angkuaigenma ine sing·anina agan-talataniko on·angaha.
