Shillong, Nov 20: Bangladesh a·song baksa international sima-ariko sualgrike dongenggipa joloniko mang 53 matchurang baksana uko badingsrukatgipa gimik sakdok manderangko da·al Sukrobar salo rim·aha.

Iani bidingo Border Security Force (BSF)oni koborna seachi u·iatani gitade, songsul a·song Bangladesh-china niam gri matchurangko badingsrukatenggipa India-ni sakdok manderangko salgipeng Jaintia Hills district-ni Dawki sambajoloniko rim·aha. Gimik-gimang mang 53 matchurangko trak garioniko sekaha aro ia matchurangko uamangni ra·baani bewalrangara Prevention of Cruelty to Animal Acts-ni kosako dakbadeani ong·a, ine uamang aganaha.

Rim·a man·gipa manderangko a·bachenge sing·rikkiatachi ma·sina man·ani gita, ia matchurangko uamang Guwahati (Khanapara)oniko ra·baaha aro uno adita rokkomni matchurangba gnang jerangkon salgro-salaram a·dokrango ramram man·rongja.

Dingtang dingtang checkpoint-rang baksana National Highway jolo a·dok damsa-damgipinni sima-arirango dongsogipa police-rangko cha·boke cha·na man·na gita ia matchurangko srik-srik ra·baani dingtang dakgipa bewalrangko uamangni jakkalenganikoba uamang parakaha, ine BSF koborna u·iatgipa janapaha.

Indakgipa ong·gija kamrangko champengna man·na gita, a·dokni daito gnanggipa bil man·giparangko iandakgipa biaprango nangrime sandiataniko dakchina aro nangenggipa biaprango checkpoint-rangko donchina gita BSF changsatai mol·molna namnika ineba seatgipao janapataha.

Matchurangko badingsrukatani gimin sandiatanichi a·doko pekatgipa samrangko badingsrukani baksa nangchapani gnangko ma·sina man·aha aro uarangoniko man·gimin tangka-paisarangkora Meghalaya-ni da·o dongrikgipa bobil dolrangna on·na gita jakkalskaienga, ineba BSF janapatjolaha.