Tura, Nov 20: A·chik Holistic Awakening Movement (AHAM) Central Executive Committee (CEC)-ni dabienggipa Garo Customary Law (GCL)-ko ta·rake ra·gatchina dabie West Garo Hills,Tura-o donggipa Deputy Commissioner (DC) offife-ona napram cholgugao tom·dake sit-in demonstration ba asonge jingjengataniko November 20, Sukrobar salo dakangaha.
AHAM-ni Vice President George Prince Ch. Momin-ni kobor ra·timgiparangna aganani gitade, ia GCL-ko dabiaoni bilsisa batangpilengjok indiba a·dok sorkari da·onaba A·chik jatni niam riti ba dakbewal-rikbewalrangko ra·gate on·kuja, uni gimin da·alo chinga skanggipa changna asonge jingjengataniko dakenga ine aganaha. Ia A·chik jatni nangchongmotgipa GCL-ko District Council, re·anggipa 2018 bilsion tarie a·dok sorkarina pakwatatahachim, indiba uko ra·chake soi ka·na gita Governor-ni tableona sokatkuja uni gimin ua taraken Governor-ona sokatna nanga. “Chinga GCL ko ra⋅e a·dokni Skotong Minister Pa Conrad Sangma-ko ia bilsini March jao uni dongchakram nok Shillong-o gronge GCL-ko ta·rake ra·gate on·china mol·molaha aro uni chingna ku·rachaka gitade GCL-ko ra·gatna process ka·engaha ine aganchakahachim, indiba da·alona kingking GCL-ko Governor ra⋅chakuja aro maming kobor dongja” ine Momin aganaha.
Ia nangchongmotgipa A·chik jatni GCL-ko a·dok sorkari ra·gate on·na gisiko nangjaode, A·chik jatni niam riti-rang gimachipgnok, ja·manode anga A·chik ine agangenchimoba jatni niam riti aro dakbewal rikbewalrangko mesokna man·jaode maming namgni dongjawaha. Maina GCL-ara A·chik jatni rim·kape janggi tangenggipa niam riti ong·a. Uni gimin a·dok sorkari GCL-ko be·en pilatna nanga aro ra·gatna nangchongmota ine AHAM dabiangaha.
Uni gisepon a·dok sorkari A·chik jatni nangenggipa GCL-na dabianiko knachakja ong·ode, mikkangchi chinga dingtang ja·ku de·aniko dake Shillong songjinmao jingjengataniko dakangskagen ineba aganaha. Minggipin Garo Hills-ni sak 24 MLA-rang ia issue-ni gimin u·iatna sikenga mai miksonganio ia GCL-ko dabiengachim ma·sina aro ku·rang on·pana nangchongmota. Maina sak 24 MLA-rang Six Scheduled quota-o pangchakesa MLA susae man·tokenga, Six Scheduled dongjaode ‘selection’-sa ong·na nanggenchim.
Uni gimin “hai an·ching A·chik jatni namgnina chanchie jatni niam ritiko ta·rake ra·gatchina A·chik jat gimik ku·mongna aro bilake ja·ku de·angna jedakode ia gamchatgipa jatni Niam Riti-ko jakrike chasongni chasongna ja·rikna nangchongmotgipa niam-riti ong·a ” ineba ua agandapangaha.
Da·alo chinga GCL-ko dabie skanggipa changna Tura songjinmao salsa asonge jingjengataniko dake matchotani ja·mano West Garo Hills-ni DC-ko gronge GCL-na dabie chingni segimin lekkako on·angtaigen ine Momin aganaha.
