Shillong, Naitung 04 : Ka Dorbar Shnong Nongrim Hills ha ka sngi Saitjain kala pynshai ba ka No Objection Certificate ba iadei bad ka Blinkit kam dei kaba la ai da u Rangbah Shnong marwei, hynrei da ka Executive Committee hadien ka jingiatai kaba bniah bad la ai ruh ia ka ha ka kyrteng jong u nongshongshnong ka Shnong, ym beit beit sha ka kompani.
U Rangbah Shnong ka Nongrim Hills, Bah Bantylli Nari, ula ai ia ka jingpynshai haba iakren bad ki nongthoh khubor haba jubab ia ki jingkynthoh jong u Chief Executive Member (CEM) ka KHADC Winston Tony Lyngdoh.
“Kane ka long halor ka jingkren ba kren da u CEM ka KHADC. Ngim ong ba ngi pynrem ia ka, hynrei ngi sngewkhia ia ka rukom kren jong u ba u khlem ioh ia ka aplikeshon na ka Blinkit. Ula pynpaw ruh ba u Rangbah Shnong ula ai ia ka NOC” ong u Bah Nari.
“Nga kwah ban pynshai ba ka NOC kam dei kaba la ai da u Rangbah Shnong dalade. Ia ka NOC la ai da ka Executive Committee ka Dorbar Shnong Nongrim Hills, kaba don lai ngut kiba soi kyrteng. Ka NOC kaba la ai kam dei beit beit sah ka kompani Blinkit hynrei sah u briew uba kyrteng u V Kurbah, u nongshongshnong ka Rynjah, uba la iatehkular bad ka kompani Blinkit” ula bynrap.
U Bah Nari ula pynpaw ba ia kane ka rai ym shym la shim da ka jingleh kyrkieh.
“Ka NOC hi ka dei ha ka kyrteng u V Kurbah. Kane ka dei ka jingpynpaw jong ngi ba ngi kwah pyntip paidbah na ka Dorbar Shnong. Ka NOC kam dei kaba la ai khlem ka jngiathir. Ngi la iakren sani bha halor kane ka kam bad ngi la shim bun ka por ban pyrkhat ia ki jingmyntoi bad jingktah haba ai ia kum kine ki NOC. Hadien ka jingiathir, ngi la shim ia ka rai na ka bynta ka jingmyntoi jong u paidbah babun balang” ula ong.
Haba kynthoh ia ki jingsngewkhia u CEM ka KHADC ba ka jingwan rung ka Blinkit kan ktah ia 4000 tylli ki dukan ha Shillong,u Bah Nari ula ong ba ka jingpynleit jingmut ka dei ban long ia ki nongthied nongpet khamtam ia ki longiing kiba duna ka jingmih.
“Kumba u CEM ula ong ba kan ktah ia 4000 tylli ki dukan ha Shillong, Nga tharai ba ngi hap ban khmih ia kaei kaei kaba kham heh. Ngi don ia u paid nongshongshnong ba 6 lak ha Shillong. Na kine, 4 lak ki dei kiba trei-middle class bad lower class- bad palat 2.5 lak ki dei kiba im na kti ha shyntur. Kane ka dei kaba ngi la iakhmih” ula ong.
Ula kdew ba ka jingai discount ia ki mar ki mata da ka Blinkit ka dei ka daw bah ba ngi kyrshan ia ka jingtyrwa.
“U CEM ula pynpaw ba ka Blinkit ka ai 20-22 percent discount. Ngi dei ban pyrkhat da kumwei. Ia mynta, lada ngi thied eiei na Shillong ha ka dor MRP, ym don kawei ruh ka dukan ban ai discount satang lada phi ithuh bha ia ki. Hynrei ka Blinkit ka lah ban wan bad ai 20% discount, hato ngim dei ban pynshlur ia ki na ka bynta ka jingmyntoi jong u paidbah babun balang” buh jingkylli u Bah Nari.
“Ta ka daw, hadien ka jingiathir kaba sania bha, ka Dorbar Shnong Nongrim Hills kala rai ba kan long ka jingmyntoi ia ki paidbah ka Shillong, bad wat ia kiwei ki district ruh kumjuh” ula bynrap.
U Bah Nari u pyntip ba ka Blinkit ka don jingthmu ban buh palat ia kawei kadukan hapoh ka dor.
ka jingaikam, ula ong ba ka Dorbar Shnong kala buh kyndon ban aikam nyngkong eh ia ki trai shnong.
U Bah Nari ula buh jingkylli ruh ia ka jingpynksan nia ba ki iew online kin pyniap ia ki iew tynrai bad kyntu ia ka KHADC ba kan iarap ia ki dukan trai shnong ba kin lah ban iaknieh ia ka iew (compete).
“Ka District Council ka dei ruh ban pyrkhat ba lada ki ong ka jingthied tiar online kala ktah ia ki dukan ha Shillong- hato ki jingthied tiar online kum ka Amazon bad Flipkart kila krah ia ka Khyndailad?, watla katta ki dang don hi hangtei. Ki briew kiba kwah ban tied na ki dukan kin leit na ki dukan bad kito kiba thied onlne kin thied online. Nga tharai ba ngi dei ban don ia ka jinglait luid” ula ong.
Haba kdew ia ka jingkyrshan na ka Liang Pyrshah, u Bah Nari ula ong “Ha ka jingshisha, u Nongialam ka Liang Pyrshah ruh ula pynmih ia ka jingkynthuh ba pynrem ia ki jingkren u CEM bad pynshlur ba ia ka lisen dei ban ai sha ka Blinkit ba kan treikam ha Shillong. Nga tharai kane ka kam ka donkam ban iatai namar ka ktah beit beit ia ki paidbah khamtam ki longiing kiba duna ka jingioh”.
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
