Shillong, March 22: A·dok sorkarini dingtang dingtang kamrangko kona-noksikoni manderangona sambabatatna gita, Meghalaya sorkarini miksongani gnang ine Assembly-o aganangengon, batanggimin chango a·dok sorkari, ge·sku gital C&RD Block-rangko a·doko songe on·angaha ine Community & Rural Development Minister Pa Abu Taher Mondal, Butbar salo, assembly-o u·iatangaha.

Indake ong·engon, Mawhati-ni Congress MLA Pa Charles Marngar aro Nongkrem-ni VPP MLA Pa Ardent Basaiawmoit-maangni gital block-rangko songtaiani bidingo a·dok sorkario sing·doanggipana, Mawhati aro Nongkrem-na gital C&RD block-rangko on·na gita da·odipet chanchia dongkuja ine aganchakangskaaha.

Mawhati-na gital block-ko on·china gita Synjuk ki Rangbah Shnong, a·dok sorkario dabianirangko dakenga aro batanggimin 2021 bilsion iani bidingo memorandum-koba on·ahachim ine Pa Marngar janapatenba, Umsning block-ona chu·gimik km 80-rang dongani a·sel Mawhati jolo songdongenggipa manderangni chagrongenggipa neng·nikaniko aro manderangni dabienggipako man·adipet chu·sokchina gitaba ua, a·dok sorkario mol·molangaha.

Manderangni dabienggipani bidingo chanchirimchenge kamko ka·na gita ka·dongataniko on·angenba, gital block-rangko songani gimin a·dok sorkari tik ka·ade dongkuja, indioba sorkarini kamrangko manderangona sokatna gita sorkarini miksongani ong·a ine minister aganangaha.

Iakoba poraie nina man·gen: Shyamnagar MDC-ni nokoniko feet 5 batgipa chipu nokma mangsako man·a