Shillong, Sept 29 : Shillong-ni Mawlai jolo donggipa CRPF camp-ko gipin biapchina ra·jitangchina gita dabiani ku·rangrang rakbatroroengani gimino uamangna pangkamgipa biapko sandieming jitatani bidingo CRPF-ni officialrang aro Meghalaya sorkarini gisepo Butbar salo agan-golpogrikangaha.
Iani bidingo koborna aganangenon, tom·e chanchirimanio CRPF aro police department-ni dingtang dingtang officialrang bakko ra·angtokaha ine home minister Pa Lahkmen Rymbui Butbaro u·iataha.
Ia tom·anio, home minister baksana skotong minister aro dakchakgipa skotong minister-ba bakko ra·angaha.
“CRPF cam-ko gipinchina ra·jitangna gita pangkamgipa biapko sandiani gimin mongsongbate chinga agangrikangaha, maina a·dokni manderangna chelchakani aro naljokanirangko on·anio CRPF-sa mongsonggipa ong·a,” ine home minister janapataha.
Iani bidingo tom·e agangrikanio uamang maming tik ka·grikaniko daknade man·srangkuja indiba obostarang aro cholrango pangchake somoi gita iani gimin sorkari chanchirime tik ka·gen ineba ua u·iatjolaha.
