Shillong, Sep 7: Budbar salo, Meghalaya a•dokni Chief Minister Conrad K Sangma, a•dokni Deputy Chief Minister Prestone Tynsong baksana Mawryngkneng-ni MLA aro MDC Pyniaid Sing Syiem-ni mikkango, Mawryngkneng community health centre (CHC)-ko nokdonggae on•angaha.
Ia CHC-ko nokdonggae on•angani somoio an•o donggipa me•chikrangna Transit Home-koba aro Self Help Group (SHG)-rangni mela-koba a•bachengate on•angjolaha.
Ia CHC aro Transit Home-ko nokdonggae on•angan baksana SHG-rangni mela-ko a•bachengate on•na man•ahani gimin an•tangni kusi ong•aniko parakangengon, ia minggittam kamrangan me•chikrango nangchakegipa ong•a ine Chief Minister parakataha.
Me•chikrangna an•seng baljokaniko, a•gilsakni seng•aniko aro songo noko mangrakbatataniko on•na gitasa sorkari, Meghalaya’s Outcome & Transformation in Health, Education & Rural Sector (MOTHER) program-ko ra•gate on•aha ineba ia tom•anio Chief Minister parakataha.
Transit Home for High-Risk Pregnant Women-ni gimin talataniko on•angengon, ian chel•a biaprangoni an•o donge re•baenggipa me•chikrangko nokchakna gita rike on•gipa nok ong•a aro da•o a•dok gimiko dam 180 transit home-rangko sorkari kulie on•aha ine Chief Minister parakataha.
SHG-rangna dakchakanirangko on•anichi da•o songadam nokadamrango me•chikrangko bilakbatatna man•engaha aro da•o ia SHG-rangna bang•bata dakchakanirangko aro tangka paisarangko on•na man•na gita sorkari ia SHG-rangko cooperative society dake ong•atna miksongenga ineba Sangma parakataha.
Chief Minister-ni parakatani gitade, Mawryngkneng CHC-o ge 6 palangoniko da•o ge 30 palangona bariataha aro mikkangchi ia CHC-o dingtang dingtang sanna banani cholrangkoba on•na jotton ka•anggen.
Meghalaya a•doko donggipa SHG-rangko NRLM program-ni dakchakna gita a•dokni Chief Minister, a•dokni dam 12 a•jarango donggipa dol 896 village organisation (VO)-rangna gong kror 20 tangkarangko Community Investment Fund (CIF)-ni bimingo on•ataha aro ian a•dok gimikni ge 46,700 nokdangrango nangchakegipa dol 4676 SHG-rangna namgni ong•gnok.
Ia gong kror 20-oni kror 4-kode East Khasi Hills a•jana aro kror 1-kode Mawryngkneng Block-na chamataha. Ia tom•anio Mawryngkneng-ni dol 5 VO-rang, gong lak 43-ni CIF fund-ko man•aha.
Ia apsan somoion Mawryngkneng Block-ni dol 5 SHG-rangnaba gong lak 5-ni bank loan-rangko on•angjolaha.
Chief Minister-ni Mawryngkneng-ona re•angengmiting somoio ua Mawlyngngad Presbyterian Secondary School, St Mazarello Secondary School, Sohryngkham-o donggipa Mount Zion Secondary School aro Green Hills Secondary School-ni chatro chatrirang aro skigiparangkoba gronge agangrikangaha.
