Shillong, July 8: Bristibar salo, Mawsynram-ni MLA HM Shangpliang, Meghalaya a•dokni Chief Minister Conrad K Sangma-ko grongenba, Mawsynram-ko civil sub-division songchina dabienggipani bidingo agangrikangaha.
Iani bidingo Mawsynram-ni MLA, dingtangmancha chittikoba Chief Minister-na on•angaha aro uni Mawsynram-ko civil sub-division songchina dabienggipani bidingo talate on•aniko knatimahani gimin ua Chief Minister-ko mittelpilangaha.
East Khasi Hills a•jao Pynursla aro Sohra sub-division-rang baksana Mawsynram-ko civil sub-division songna biaprang meliama melijawa ukoba Shangpliang, Chief Minister baksa niangjolaha.
“Chingni agangrikani chu•sokgipa ong•aha aro Mawsynram-ko civil sub-division songchina dabianiara kraa gitan ong•enga ine chief minister angna aganaha. Iani bidingo ua nipiltaienba, nangani kri ja•kuko de•na gitaba angna ku•rachakataha,” ine Chief Minister-ko gronge agangrikeani ja•mano Mawsynram-ni MLA parakataha.
Shangpliang-ni aganani gitade, Mawsynram block-oni Shillong-ona aditan chel•ani gimin on•tisa kamrangna re•ruraanirangoba manderang neng•nikanirangko man•tokna nangenga aro uandaken Mawsynram-koba dingtang sub-division songna nangengachim.
